Ayong Paulo ka Timoteo lu kirai ngikasubak etich a Yesu Kiristo kesi kigirunit abarua naga. Kigirakinit esi ngikanupak lu iyakasi Pilipi, lu imorikinosi aapei ka Yesu Kiristo, ka esi ngikarikok ta lu ingarakinito ngitunga a ekanisa.
Ketamunit ayong esi jiik! Kotere nguna, itemokino ayong etami ngakiro kus loger lo tokona etamea. Kainyo ianyut esi daang ka ayong aapei ajokis naketaanyu ayong Akuj, napei ana tokona kaenitere ayong alojela ka tani nakolong pekaenitere ayong na eruoror ngakiro naajokak etenik lokojokon.
Ngakiro na kemuito ayong noi nabo na egieno ayong ngesi na atamar nyekeruma ayong ngileech alotich kang tani wadiochichi. Nakaneni asaki ayong atotitinyer jiik ka tokona dang, sodi kipuruunere Kiristo aloboyor kang kadaang, erai kayari ayong kori katoana.
Anupit ayong dir akiroit ngina, kotere anupit ngina, ayeni atamar arubakini kirukit ka esi daang, sodi kengarak esi torotokis ngaren nabo talakaros ananupit kus.
Tokona, akiroit nateno ngesi na ejoikinitor eboyor kus ikokini eger lo echamakinitae anakiro ana ajokak a Yesu Kiristo. Sodi ani kabu ayong aanyun esi kori pekabu, eirarea ayong atamar eteniyete ngakiro a eboyor kus ipuposi esi daang. Eira tani atamar ikote esi lu itijiete Ekipe aapei kotere ni inupitotor ngakiro naajokak.