tla ijkon, xnechajxiltilikan on paktli. Xpiyakan san se tlanemilijli. Cada se xmopiyalikan san se tetlajsojtlalistli*. San se nemoyojlo niman san se tlamachilistli xpiyakan.
Maka itlaj xchiuakan ikan nexikojli nion maka nenkinekiskej nemoueyimatiskej, yej ikan yolyemanilistli xmomatikan ika oksekimej más uejueyixtokej xken nemejuamej.
Ijkon tej, notlajsojkaikniuan, ijkon ken nemejuamej nochipa nennechtlakamatij ijkuak nemouan ninemi, más xnechtlakamatikan aman ika uejka ninemi. Aman tej, nemejuamej más xmotekimakakan ipan nemotemakixtilis ikan yolyemanilistli niman tlakaitalistli.
Maski noyesyo kitoyauaskej ken sen uentli de vino para kajxitis nemouen yejuan nenkipiyaj itechkopa nemotlaneltok niman on tlen nenkichiuaj para Dios, nikpiyas miyek paktli niman nipakis nenmouan.
Pero nemejuamej nenkimatstokej ika Timoteo sanoyej kuajli nechpaleuiya. Nenkimatstokej kenijki otekit ken nokoneu yeskia para tikteijliaj on kuajli tlajtojli.
Melauak yejua kualouaya, niman ye mikiya. Pero Dios okiknelij*, niman xsan yejua, yej nejua no onechiknelij* para xonikpix más ajmantli aparte de in yejuan ye nikpiya.
Ijkon xselikan pampa yejua ye mikiya ipampa itekiu Cristo. Okitlalij inemilis kampa ye mikiskia san para onechpaleuiko ika on tlen nemejuamej xouel onennechpaleuijkej.