Onon deerɗam'en yiɗaaɓe, ngam man tabite bana non nder kawtal mon bee Jawmiraawo. Mi ɗon yenwa on masin, onon yiɗaaɓe am, on laati daliila seyo am e tedduŋgal am.
An boo, kuuwdiɗɗiraawo am koolaaɗo, mi ɗon toro ma a walla rewɓe ɓe'e, ngam ɓe kawti bee am nder haɓre ngam Linjiila, kamɓe e Keleman e luttuɓe huuwdiɗɗiraaɓe am. Inɗe maɓɓe fuu mbinndaama nder deftere ngeendam.
Deerɗam'en, ndaa ko lutti wi'eego: Ko gooŋɗi fuu, ko haandi samɗineego fuu, ko laati adiliijum fuu, ko laaɓi fuu, ko he'i yiɗeego fuu, ko he'i teddineego fuu, ko fotti fuu e ko he'i maŋgteego fuu, kakkilane ɗum.
Mi anndi jooɗaago nder leestinaare bana no mi anndiri jooɗaago nder ɗuuɗeeŋga. Mi ekkiti heƴnitaago koo toy e koo noy, koo mi ɗon nder haarannde malla weelo, koo nder ɗuuɗeeŋga malla sooynde.
Mi heɓi dokkal ngal nelduɗon bee juŋngo Epafrodit. Mi heɓi ko mi mari haaje fuu, haa ɗum ɓuri haaje am, mi ɗon nder jeynitaare. Ɗum laati bana dokkal uurdi mbelndi, kirsaaɗum ko Allah seyorto, yerdoto.