A ni, nang, ka nghâwngkawl bahpui rinawm tak, khâng hmeichhiate kha ṭanpui tûrin ka sâwm a che; anni chuan, Klemena leh Nunna Bû-a hming chuang dangte nên Chanchin Ṭha hrilh hnaah mi thawhpui nasa si a.
A tâwp berah chuan unaute u, a dik leh zahawm apiang, a fel leh thianghlim apiang, a duhawm leh thangmawi apiang, a ṭhata, fak tlâk a nih phawt chuan, chûng chu ngaihtuah rawh u.
In mi ngaihtuahzia tûn hnaia in rawn tihlan leh theih tâk avângin Lalpaah chuan ka lâwm takmeuh a ni. Chutiang tih chu in tum reng a, remchâng in la hmu rih lo mai a ni.
Rethei taka awm dân ka thiam a, hausa taka awm dân pawh ka thiam bawk a; engkimah tlai leh rilṭâma awm dân, hausa leh retheia awm dân thurûk ka zir tawh.
Tin, Chanchin Ṭha ka hrilh ṭan laia Makedonia ka chhuahsan hnu khân nangni Filipi-ho chauh lo chuan kohhran dang pakhat mahin sum hman tûr mi ngaihtuahpui an awm lo tih in hria e,
In thilpêk zawng zawng ka lo dawng a, ka ngah ta e. Epafrodita kuta in thil rawn thawnte pawh ka lo hmu a, ka phuisui ta e. Chu chu thilhlan rimtui pawm tlâk, Pathian lâwm zawng a ni.