Nyanyui sia le tsitsim ɖe edzi hele ku tsem le xexea me godoo, abe ale si wòle ŋgɔ yim le miawo hã mia dome, tso keke gbe si gbe ke miese ale si Mawu vea ame nui, eye miese egɔme tututu la ene.
Ale tso gbe si gbe míese mia ŋkɔ ko la, gbe ko dom miele ɖa ɖe mia ta ɣe sia ɣi. Míeɖea kuku na Mawu be wòana miadze si eƒe lɔlɔ̃nu, eye miaŋɔ ɖe nunya kple gɔmesese, si eƒe Gbɔgbɔ la nana la me bliboe,
Eyae nye ta na hame la, eye hame la nye eƒe ŋutilã. Hame la dzɔ tso eyama me, eye Vi lae nye ame gbãtɔ, si tsi tsitre tso ku me, ale be wòado ŋgɔ le nu sia nu me.
Egadze eŋu be yeagawɔ ɖeka kple xexeme blibo la katã, eɖanye nu siwo le anyigba dzi alo nu siwo le dziƒo o. Vi la ƒe ʋu si kɔ ɖi le atitsoga ŋu lae he ŋutifafa sia vɛ.
Ke azɔ la, Mawu gaxɔ mi atuu to ŋutilãmeku si Via ku la me. Ku sia mee Via to gbugbɔ mi ɖo Mawu ŋkume, abe ame siwo ŋuti wokɔ, siwo ŋu fɔbubu aɖeke mele o, eye wole dzadzɛ la ene.
Ele vevie kokoko be mialé nu si dzi miexɔ se la me ɖe asi. Minɔ te sesĩe eye mili ke. Migaɖe miaƒe susu ɖa le mɔkpɔkpɔ si Nyanyui la he vɛ na mi la ŋu o. Nyanyui siae woɖe gbeƒãe na nuwɔwɔ siwo katã le xexea me, eye eya ƒe subɔlae nye, Paulo hã meva zu.
Fifia la, enye dzidzɔ nam be makpe fu ɖe mia ta. Mele fu kpem le nye ŋutilã me, be mawu fu siwo susɔ Kristo nakpe, ɖe eƒe ŋutilã, si nye hame la ta la, nu.
Mawu lɔ̃ be yeaɖe nya ɣaɣla sia ƒe asixɔxɔ kple eƒe ŋutikɔkɔe na dukɔwo katã afia ame siwo xɔ edzi se la. Nya ɣaɣla lae nye: Kristo le mia me, eya ta ŋutikɔkɔe gã ŋutɔ li na mi.
Nenem Kristo siae míele gbeƒã ɖemee, eye míetsɔ míaƒe nunya katã le nu xlɔ̃m ame sia ame, hele nu fiam wo, ale be míava atsɔ wo dome ame sia ame aɖo Mawu ŋkume, abe ame siwo wɔ ɖeka kple Kristo eye wotsi de blibo la ene.