क्जोकि जे मैं तुहां ते दूर ऐ, तमी मैं तुहां दे बारे च सोचदा रैंह्दा ऐ, कने मैं खुस हुंदा ऐ, कि जिंआं तुहां जो जीणा चाइदा था, तिंआं ई तुहां ज़िन्दगी जींदे हन, कने तुहां दा बसुआस मसीह च पक्का ऐ।
ध्यान रखा कि कोई तुहां लोकां जो तिन्हां बेकार गल्लां ते वेबकूफ ना बणा। एह़ बेकार गल्लां सुणने च तां ज्ञाने दियां लगदियां हन, क्जोकि एह़ गल्लां तां सिर्फ संसारे दे लोकां दे पास्से ते हन, अपर मसीह दे पास्से ते नीं।
कने तिन्हीं अहां दे अपराधां दा चिट्ठा सूल़िया पर मेखां नैं जड़ी करी सामणै ते हटाई दित्ता ऐ, जेह्ड़ा मूसा दिया व्यबस्था जो नीं मन्नणे दिया बज़ाह ते अहां दे नांऐ पर लगया था।
कने तिन्हीं मसीह दे सूल़िया पर मरने दे जरिये संसारे दे अधिकारियां कने हकुमता जो हराई करी तिन्हां दा सारेयां सामणै तमासा बणाई दित्ता, कने तिन्हां पर जीत्त हासल करी नैं बड़ी खुसी मनाई।
इसतांई कोई भी तुहां दा एह़ ग्लाई नैं, कि तुहां जो क्या खाणा पीणा, या होर त्योहार मनाणे, या नौये चन्द्रमे दा त्योहार मनाणा, या बिस्रामे आल़े दिने दे बारे च फैसला ना करैं।
कोई भी माणु, जेह्ड़ा दीनता दे ढोंग कने सुअर्गदूतां दी अराधना च लीन ऐ, तुहां जो तुहां दे इनामे ते दूर नीं करी सकैं। ऐदेया माणु इश्वरे दे दर्शन दिक्खणे च ढींगा मारदा ऐ। अपर एह़ सब बकबास ऐ क्जोकि तिन्हां दे दिमाग मतलबी इच्छां नैं भरोया ऐ।
जाह़लू ते तुहां दा पापी सभाव यीशु मसीह सौगी मरी गेआ ऐ, तां तुहां जो इस संसारे दे कायदे कानूना जो मन्नणे दी कोई जरूरत नीं ऐ। इसतांई हुण भी तुहां इस संसारे दे कायदे कानूना जो क्जो मनदे हन, जिसते लगदा ऐ कि तुहां हुण भी इस संसारे दे बसे च हन।
एह़ कायदे कानून तां खरे रस्ते दे पास्से लेई जाणे आल़े लगदे हन, सैह़ एह़ हन, जेह्ड़े अपणे आप्पे जो जबरदस्ती परमात्मे दे भक्त बणने दे जरिये, कने दखावटी दीनता, कने अपणे सरीरां नैं बड़ा बुरा बर्ताब। अपर ऐत्थु तिकर कि जाह़लू लोक इन्हां कायदे कानूना जो मनदे हन, भिरी भी सैह़ अपणे पापे आल़े चाल-चलणे जो नीं रोकी सकदे।