Nalī na ng'hūmbū balūngūjiwe ū mu ng'holò jabo, hangī babize na būsangī ū mu būtogwa, nū mu būsabi ū bose ūbo balī nabo kūlwa kūbūmana mu ng'hana ū witegeleja, nū mu kūmana mu būshikanu bose ū Kilisito, ūyo alī mbisīla ya ng'wa Mulungu.
Ilang'hanagi atizilonga wa kūmujananīja kūlwa malange ga nyasala sala, na mihayo midūhū ya nyalomolomo, ya kūlondeela nhūngwa ja mu sī na mihayo ya kūlekwa bakūlūgenji, īyo ītī mu kahelele ka ng'wa Kilisito.
Na hangī ū mulī we musaalilwe mu būsaalwa ūbo būtī bo kūbeejiwa na makono mu nzīla ya kwīnja ikoba lya mīlī; alīyo musaalilwe būsaalwa bo ng'wa Kilisito.
Atadimanile nago ū Ntwe, ūyo pyī ū mīlī gūdimanyiwe hamò kūlwa nguno yago, mu nzīla ya nge na matimba; nose gūkūlishiagwa gīkī gūkūle mu kakūlīle ka kūfuma kūlī Mulungu.
Ī gīsī ūlū muchile hamò na Kilisito ū kū mihayo ya mu sī, numho mulī na nguno kī hangī ū kūbiza gītī mulī banhū ba mu sī, nose mukwikalaga musugilwe na shilagīlo sha mu sī; gīkī,
Na ng'hana ī chene ī yoi īkilongaga gītī mitengeke, ūlū munhū atogilwe kwihedeka wei ng'wenekīlī mu mbika ndebe ya kalamīje, nūūlū mu wibembu bo higūlya gūlya, nūūlū mu mhayo gwa kwiluhya mīlī; gwike ī yoi ītī na būdūla bose bose bo kūhangīja kwikūmva kwa mīlī.