×

పవిత్తర్ బైబిల్ 2025

కొలస్సీవాళూన 3

1
తమ్ క్రీస్తూతీ సదా ఊటేజకొవేన్ రోతో ఊంపర ఛజేనజ్ ఢూండో, ఒత్త క్రీస్తూ, దేవేర్ జమణ్ పాక్తీమా బేటోచ.
2
ఊంపర ఛజేర్ పరజ్ పణ్, జమ్మీపర ఛజేర్ పర దల్లేన రకాల్డోమత్; కూఁకతో తమ్ మర్గేచో. తమార్ దమ్ క్రీస్తూతీసదా దేవేమా గోకాన్ ఛ.
3
4
అపణ్ జీవ్ వేన్ ఛజకో క్రీస్తూ దకావజనా తమ్ సదా ఓతీసదా మహిమమా దకావోచో.
5
జేతీ జగేపర ఛజకో తమార్ జీవ్డార్ భాగేవూఁన, కతో ఛనాళేనన్, అపవిత్రతాన, కామమేర్ ఆశానన్, ఖరాఫ్ ఆశానన్, మూర్తేవూఁర్ పూజా వేన్ ఛజకో ధనేర్ ఆశావూన వతోయి మార్నాకో.
6
ఉందూర్ కార్ణే దేవేర్ రీస్ ఓర్ హేట నవ్ణేతీ రేనిజేర్ ఉంపర ఆవచ.
7
పేనా ఉందూర్ వచ్చ బంచేజనా తమ్ సదా ఇందూన మాన్లేన్ చాల్లిదే.
8
లపణ్ అబ్బ తమ్ రీసన్, క్రోధ్, దుశ్టతా, భూండ్ గాళి, ఏసేన ఛోడ్డో.
9
ఏకేతీ ఏక్ లబారీ కరోమత్; కూఁకతో పేనార్ గోణేన ఓర్ కావతేతి సాత్ ఓన ఛోడ్డెన్ జ్ఞానేతి రేణో కన్ ఓన తయ్యార్ కిదోజేర్ నైఁ నవ్వో వేరోజకో నవ్వో గోణేన ప్యార్లేన్ ఛో.
10
11
అసేమా గ్రీస్ దేశే వాళో కన్, యూదావాళో కన్, సున్నత్ లేల్దేజకోకన్, సున్నత్ లీదేకొనిజకోకన్ భేద్ ఛేని, పరదేశికన్, సిథియావాళో కన్, బాఁయాకన్, స్వతంతర్వాళోకన్, భేద్ ఛేని పణ్ క్రీస్తూజ్ స్వగ్ళీన్, సేమా ఛజకో వేన్ ఛ.
12
జేతీ దేవేర్ హాత్ నియమ్ వేమేలేజకోన్ పవిత్తరన్ ప్రేమేర్ ఛజే జనేన ఛాజజూఁ, తమ్ ప్రేమేర్ గోణన్, దయార్ గోణన్, నవణేతి రేరోన్, సాదాపణోన్, ఖమేరో గోణ్ ప్యార్లో.
13
కుణీ ఓన హాణ్ కిదో కన్ కేలతో ఏకేన ఏక్ ఖమన్ ఏకేన ఏక్ క్షమా కరో. ప్రభూ తమేన క్షమా కీదో జూఁ, తమ్ సదా క్షమా కరో.
14
ఏ సేర్ పర భర్పూర్-పణేతి జోడాన్ ఛజకో ప్రేమాన ప్యార్లో
15
క్రీస్తూ దేమేలో జకో శాంతీన తమార్ దల్లేమా పాలణ్ కరేదో. ఏర్-వాసజ్ తమ్ ఏక్ జీవ్డా కన్ కేరాయేచో; ఉజ్జీ కృతజ్ఞుతాతి రో.
16
గీదేఁవూతీన్ కీర్తనేఁవూఁతీన్, ఆత్మార్ వడీర్ భజనేఁవూఁర్ గీదేఁవూఁతీ ఏకేన ఏక్ బోధా కర్తే, బుద్ధీ కేతే కృపాతి సాత్ తమార్ దల్లెఁవూఁమా దేవేర్ వాసు గాణా గావ్తే, సొగ్ళీ తరీకార్ జ్ఞానేతి క్రీస్తూర్ వచన్ తమార్మా భర్పూర్ జీవన్ రేదో.
17
ఉజ్జీ వాతేతిక, కామేవూఁతి వతోయి, తమ్ కాఁయిఁ కరోతోయి, ప్రభూ చజకో యేసూర్ వడీతీ బాప్ ఛజే దేవేన కృతజ్ఞతాస్తుతి దేతే, సొగ్ళీ ఓర్ నామేర్ పర కరో
18
బీరేవో, తమార్ ఘరేవాళేఁవుతీ నవ్ణేతీ రో. కసేన కతో ఈ దేవేమా ఛాజజకో వేన్ ఛ.
19
ఘరేవాళేవో, తమార్ బీరేవూఁన ప్రేమ్ కరో, ఉందేన సతావొ మత్.
20
ఛచ్యాబరో సే వాతేర్ వడీ తమార్ యాడిబాపేర్ వాత్ మానో; ఈ దేవేర్మా ఖాతర్ పాయెన ఛాజచ
21
బాపేవో, తమార్ ఛచ్యాబరేర్ దల్ హిమ్మత్ హార నజూఁ ఉందూన రీస్ మత్ ఛుటాడో.
22
బాఁయాఁవో మన్క్యాన ఖుషీ కరజేర్-నైఁ ఆంకీన దకావ్ణో కన్ కొనిపణ్, ప్రభూర్ డరేతీన్ సాఫ్ దల్లేతీ జీవ్ డార్వడీతి సే వాతేర్వడీ తమార్ మాలీకేఁవుర్ వాత్ మానో
23
ప్రభూర్ వడీతి హాఁసేర్ ఫళ్ పాఁవాఁచాఁ కన్ మాలమ్ కర్లేన్ ఛో జేతీ, తమ్ కాఁయిఁ కరోతోయి సదా, ఊ ఆద్మీర్ వాస కొని పణ్, ప్రభూర్ వాసకన్ తమార్ భర్పూర్ దల్లేతీ కరో. తమ్ ప్రభూ ఛజకో క్రీస్తూర్ దాస్ వేన్ ఛో.
24
25
ఢోకో కీదోజకో, ఊ కీదోజకో ఢోకేర్ ఫళ్ పావచ. భేద్-భావ్ రేని.
Lambadi Bible 2025
2025, The Bible Society of India
:
Save Notes