|
| 1 |
|
| Choh chú-lâng--ê, tio̍h kong-pêng ha̍p-lí tùi-thāi lín ê lô͘-lē, lín chai, lín tī thiⁿ-téng mā ū chi̍t ūi Chú-lâng. |
|
| 2 |
|
| Tio̍h kè-sio̍k pek-chhiat kî-tó; kî-tó ê sî tio̍h kéng-séng, tio̍h kám-siā. |
|
| 3 |
|
| Mā tio̍h ūi-tio̍h goán kî-tó, kiû Siōng-tè hō͘ goán ū thoân sìn-sit ê ki-hōe, thang soan-iông Ki-tok ê ò-pì; góa sī ūi-tio̍h chit-ê chiah teh chē-kaⁿ. |
|
| 4 |
|
| Tio̍h ūi-tio̍h góa kî-tó, hō͘ góa ōe-tàng chiong eng-kai kóng ê ò-pì kóng chheng-chhó. |
|
| 5 |
|
| Tio̍h siān-iōng ki-hōe, tùi-thāi bī-sìn-chiá tio̍h ū tì-hūi. |
|
| 6 |
|
| Kóng-ōe put-sî tio̍h un-hô, chhin-chhiūⁿ ēng iâm tiâu-bī, chai-iáⁿ tio̍h án-chóaⁿ ìn-tap ta̍k-ê lâng. |
|
| 7 |
|
| Koan-hē góa it-chhè ê tāi-chì, chhin-ài ê hiaⁿ-tī Chhui-ki-kó͘ ōe kā lín kóng; tī Chú ê kang-chok i kap góa chòe-hé choh po̍k-jîn, tiong-si̍t teh ho̍k-sāi. |
|
| 8 |
|
| Góa chhe i khì lín hia, sī ài pò lín chai goán chia ê chêng-hêng, hō͘ lín ê sim tit-tio̍h kó͘-lē. |
|
| 9 |
|
| O-nî-se-bô͘ ōe kap i chòe-hé khì; i sī lín hia ê lâng, sī tiong-si̍t koh chhin-ài ê hiaⁿ-tī. In ōe chiong goán chia it-chhè ê tāi-chì pò lín chai. |
|
| 10 |
|
| Kap góa chòe-hé chē-kaⁿ ê A-lí-ta̍t-kó͘ beh kā lín chhéng-an; Pa-ná-pa ê piáu-sió-tī Má-khó mā beh kā lín chhéng-an. Koan-hē Má-khó, góa í-keng ū kā lín kau-tài, i khì ê sî tio̍h kā i chiap-thāi. |
|
| 11 |
|
| Hit-ê kiò-chòe Iû-sū-to͘ ê Iâ-so͘ mā beh kā lín chhéng-an. Tī Iû-thài -lâng sìn-tô͘ tiong chí-ū chit saⁿ ê lâng ūi-tio̍h Siōng-tè-kok teh kap góa tâng-kang, in ū hō͘ góa chin tōa ê an-ùi. |
|
| 12 |
|
| Tùi lín hia lâi Ki-tok Iâ-so͘ ê po̍k-jîn Í-pa-hut beh kā lín chhéng-an. I sî-siông ūi-tio̍h lín pek-chhiat kî-tó, kiû Siōng-tè hō͘ lín khiā-chāi, choh sêng-se̍k ê lâng, khak-sìn Siōng-tè lóng-chóng ê chí-ì. |
|
| 13 |
|
| Góa thang chèng-bêng, i khak-si̍t ūi-tio̍h lín kap tòa tī Ló-tí-ka í-ki̍p Hi-la-pho-lí ê lâng sin-khó͘ chòe kang. |
|
| 14 |
|
| Chhin-ài ê i-seng Lō͘-ka kap Tí-má beh kā lín chhéng-an. |
|
| 15 |
|
| Chhiáⁿ lín thòe góa kā Ló-tí-ka ê hiaⁿ-tī chí-bē kap Lêng-hoat, í-ki̍p tī in tau teh chū-hōe ê kàu-hōe chhéng-an. |
|
| 16 |
|
| Chit-tiuⁿ phoe lín tha̍k liáu, tio̍h siat-hoat mā hō͘ Ló-tí-ka ê kàu-hōe tha̍k; lín mā tio̍h tha̍k Ló-tí-ka ê kàu-hōe choán hō͘ lín ê phoe. |
|
| 17 |
|
| Tio̍h kā A-ki-pò͘ kóng, “Lí só͘ niá-siū ho̍k-sāi Chú ê chit-bū it-tēng tio̍h oân-sêng.” |
|
| 18 |
|
| Góa Pó-lô chhin-pit kā lín chhéng-an. Tio̍h ōe-kì-tit góa teh chē-kaⁿ. Goān Siōng-tè ê un-tián kap lín tông-chāi! |
|
|
|
|