Subong man magpangamuyo kamo para sa amon, agod nga ang Dios maghatag sa amon sing maayo nga kahigayunan sa pagwali sang iya pulong nahanungod sang sekrito ni Cristo. Kay amo ini ang kabangdanan nga karon nabilanggo ako.
Ang aton hinigugma nga utod nga si Tiquico nga isa ka matutom nga manugpangabudlay kag masigkaalagad sa hilikuton sang Ginoo, amo ang magasugid sa inyo sang tanan nahanungod sang akon kahimtangan.
Ginaabiabi kamo ni Aristarco nga kaupod ko diri sa bilangguan kag ginaabiabi man kamo ni Marcos nga pakaisa ni Bernabe. (Ginsingganan na kamo nga batunon ninyo sia kon mag-abot sia dira sa inyo.)
Si Josue nga ginahingalanan Justo nagaabiabi man sa inyo. Ini sila nga tatlo amo lamang ang mga Judio nga karon nagatuo kay Cristo nga nagapangabudlay upod sa akon para sa Ginharian sang Dios, kag daku gid ang ila nabulig sa akon.
Nagaabiabi sa inyo si Epafras, isa man ka katapo ninyo kag alagad ni Cristo Jesus. Pirme sia nagapangamuyo sa Dios sing hugot sa iya tagipusoon para sa inyo, nga magmalig-on kamo, maghamtong kag napasalig sing bug-os sa inyo pagtuo kay Cristo kag nagatuman sing himpit sang iya kabubot-on.
Ako, si Pablo, amo gid ang nagasulat sini nga mga pag-abiabi. Indi ninyo pagkalimti nga may gapos ako nga mga kadena! Kabay nga ang pagpakamaayo sang Dios manginyara sa inyo.