Nasayod kamo nga sa didto pa kami sa Filipos, gipaantos ug gipakaulawan kami. Apan gidasig kami sa Dios sa pagwali kaninyo sa iyang Maayong Balita bisan pag daghang misupak niini.
Nagwali kami kay napamatud-an sa Dios nga kapiyalan kami sa Maayong Balita. Wala kami tuyo sa pagpahimuot sa tawo kondili sa Dios nga nagsusi sa atong kasingkasing.
bisag mahimo namong gamiton ang among awtoridad ingon nga mga apostoles ni Cristo aron ipabuhat kaninyo ang among gusto. Apan sa diha pa kami uban kaninyo, nagmalumo kami kaninyo sama sa usa ka inahan nga nagmatuto sa iyang mga anak.
Tungod sa among gugma kaninyo, among giwali kaninyo ang Maayong Balita sa Dios. Gitahan usab namo ang among kaugalingong kinabuhi kay kamo gimahal man namo pag-ayo.
Mga igsoon, sa walay duhaduha nahinumdoman pa ninyo giunsa namo paghago. Nagtrabaho kami adlaw ug gabii aron dili kami makahasol kaninyo sa among pagwali kaninyo sa Maayong Balita sa Dios.
Gidasig namo kamo, gilipay ug gitambagan kanunay sa pagkinabuhi sa paagi nga makapahimuot sa Dios kinsa maoy nagtawag kaninyo aron kamo makaambit sa iyang Gingharian ug himaya.
Ug gipasalamatan usab namo kanunay ang Dios kay sa dihang giwali namo kaninyo ang iyang mensahe namati kamo ug gidawat ninyo kini dili ingon nga iya sa tawo kondili iya gayod sa Dios kay ang Dios naglihok diha kaninyong mga magtutuo.
Mga igsoon, ang nahitabo kaninyo sama usab sa nahitabo sa mga simbahan sa Dios sa Judea—sa mga magtutuo ni Cristo Jesus. Gilutos kamo sa inyong katagilungsod ingon nga ang mga magtutuo didto sa Judea gilutos sa mga Judio.
Gibabagan gani kami nila sa pagwali ngadto sa mga dili Judio sa mensahe nga makaluwas kanila. Kining gibuhat nila maoy nakapuno sa taksanan sa ilang pagkadaotan busa gisilotan gayod sila sa Dios.
Bahin kanamo, mga igsoon, niadtong panahon nga kami nahimulag kaninyo sa makadiyot, kanunay kaming naghandom kaninyo. Gimingaw kami pag-ayo kaninyo ug naningkamot gayod sa pagpakigkita kaninyo.
Kamo lamang ang among paglaom, ang among kalipay ug ang hinungdan sa pagpagarbo namo sa among kadaogan atubangan sa atong Ginoong Jesus inig-anhi niya.