Ammaa koo nde ndenno min njarii torra e semtineeki e Filibi, non no anduɗon, e ballal Allah meeɗen min kokkii'on Habaru Belɗum ƴiwoyɗum to maako kulol walaa, koo nde yimɓe nganyiimin naa' seɗɗa.
Ammaa non no Allah hooloriimin hokkimin kuugal wa'ajinki Habaru Belɗum, non min nga'ajinirtaɗum, naa' ngam min mbelnana yimɓe ɓerɗe, ammaa ngam min mbelnana Allah ɓernde kanko poondoowo ɓerɗe amin.
Ngam yidde nde min ngiɗi'on haa e min ciryii naa' min kokka'on Habaru Belɗum ɗum Allah tan, ammaa fuu e yonkiiji amin, ngam on ngartii ɓe min ngiɗi naa' seɗɗa.
Bandiraaɓe, on ngejjitaayi kuuɗe ɗe min kuwi naa' seɗɗa. Min kuwii jemma e nyalawma ngam to' min njowana goɗɗo nder mooɗon wongal teddoral carel ko min nga'ajinanta'on Habaru Belɗum ƴiwoyɗum to Allah.
Onon on ceydu'en, Allah maa o ceyduujo dow no min njooɗorinoo jonde ceniinde e aadilaaku e jonde nde walaa goɗɗum ko wooɗaa nder mooɗon, onon kooliiɓe Yeesu.
Non maa koo ndeye e min ngetta Allah, ngam carel ngel njaɓuɗon Wolde Allah nde nanɗon to amin, on njaɓaayinde bo wolde neɗɗo, ammaa on njaɓiinde nde Wolde Allah, non no nde wontindiri. E nde huwa nder ɓerɗe mooɗon, onon kooliiɓe Allah.
Bandiraaɓe, on ngartii ekkitotooɓe jonde tokkuɓe Allah wonɓe leydi Yahuudiya ɓe Yeesu Almasiihu. On njarii torra to yimɓe leydi mooɗon non no kamɓe maa ɓe njariri torra to juuɗe Yahuudanko'en.
Bandiraaɓe, ɗum sendii'en ngam carel seɗɗa nder ɓandu, ammaa min alaayi nyumuki dow mooɗon. Min kaaɓii yiiki'on; ngam non min ngaɗii ko min mbaawata waɗuki min ngi'a'on gite e gite.