Eɗon anndi ila min ngaraay to mooɗon min torraama, min kuɗaama nder si'ire Filipi. Ammaa e noon fuu Allah meeɗen hokkii min ngorgu waddango on *Habaru Belɗum ivoyɗum to ma'ako.
Ammaa Allah godake min, goonɗinii min, tamndinii min Habaru muuɗum Belɗum, noon no min mbolvirta ɗum. Gam ma'ajum min ndaaraay velgo yimɓe. Allah godotooɗo ɓerɗe meeɗen tan min ndaarata velgo.
Emin mbaawnoo hollugo on teddungal amin, gam min *lilaaɓe *Almasiifu, ammaa nde min ngondunoo e mooɗon, min ndeenii on noon no inna reenrata ɓinngel muuɗum.
Emin ngiɗi on korey, faa ɗum velii min waddango on Habaru Allah Belɗum. Naa habaru tan, ammaa emin ngiɗnoo hokkugo on faa e yonkiiji amin, sabu on laatake yiɗaaɓe amin korey.
Banndiraaɓe, on njeggitaay nde min nga'ajotonoo on *Habaru Belɗum ivoyɗum to Allah, min kuwii korey, min tampii korey. Min kuwii jemma e nyalawma fuu gam min nyaamna ko'e amin, sabu to' min laatano on donngal.
Kadimaa e woodi ko waɗi min e yettugo Allah wakkaci fuu, nde nanɗon bolle Allah e konnduɗe amin, on njaɓraay ɗe kama bolle ɓii-aadama, ammaa kama bolle Allah. Goonga, ɗum bolle Allah, eɗe kuwa nder ɓerɗe mooɗon onon goonɗinɓe.
Banndiraaɓe, on laatake kama *ikiliisiyaaji gonɗi nder lesdi *Yahuudiya. Goonga, on munyanii torraaji iri ɗi maɓɓe, on njarii bone e juuɗe lenyol mooɗon, noon no kamɓe maa ɓe njardi bone e juuɗe Yahuudu'en.