Aherrepon! Tan-taretan, kaula sadaja ampon apareng conto ka sampeyan kadi ponapa koduna odhi'na sampeyan sopaja masennengnga panggaliyanna Allah. Pajat odhi'na sampeyan ampon kadi ganeka. Nangeng samangken, bit asmana Guste Isa kaula sadaja nyo'ona kalaban sanget sarta maksa sopaja sampeyan lebbiya aehteyar pole e dhalem parkara gapaneka!
Saneyap oreng lalake' e antarana sampeyan kodu oneng kadi ponapa koduna odhi' sareng rajina kalaban cara se ekasokane Allah sareng masenneng panggaliyanna Allah sarta manossa.
E dhalem parkara se kadi ganeka, ja' kantos badha oreng se la-nyala otaba co-ngoco sataretanan. Gi' dhimen kaula sadaja ampon maenga' epakerras ka sampeyan, ja' Pangeran bakal ngokoma reng-oreng se abadhi kasala'an-kasala'an se sapaneka.
Kaula ta' parlo pole noles ka sampeyan parkara kadi ponapa samasthena sampeyan taresna ka tan-taretanna se saiman. Sampeyan dibi' ampon eajari sareng Allah kaangguy saleng taresna.
Ban sampeyan ampon noduwagi parkara ganeka ka tan-taretan se saiman e Makedoniya. Nangeng, tan-taretan, kaula nyo'ona gu-onggu sopaja odhi'na sampeyan epalebbi sae pole.
Ngoddi sopaja sampeyan ayem odhi'na sareng ta' ro'-noro' orosanna oreng laen; alako nyare kasap dibi', akadi se ampon eparenta'agi sareng kaula sadaja ka sampeyan gi' dhimen.
Tan-taretan, sampeyan kodu ngagali se salerressa parkara reng-oreng se ampon seda, sopaja sampeyan ta' sossa akadi reng-oreng laen se ta' gadhuwan pangarebban.
Sampeyan sareng kaula sadaja parcaja ja' Isa ampon seda sareng odhi' pole; ganeka sababba sampeyan sareng kaula sadaja parcaja jugan ja' Allah bakal maodhi'a pole sadajana oreng se ampon seda, se parcaja ka Isa sopaja padha'a odhi' asareng Isa.
Samangken kaula nerrangngagiya ka sampeyan pangajaran dhari Pangeran parkara se kasebbut gi' buru ganeka: E bakto Guste Isa rabu pole, reng-oreng se gi' odhi' ta' bakal ajangadha'i reng-oreng se ampon seda sabellunna.
Malaekat se agung bakal aera'a epakaja, ban tarompedda Allah bakal epamonyeya menangka tandha parenta. Saamponna gapaneka Guste Isa dibi' bakal torona dhari sowarga, ban reng-oreng Kristen se ampon seda bakal epaodhi'a pole.
Saamponna ganeka sampeyan sareng kaula sadaja se gi' odhi' e bakto ganeka bakal eangka'a epasareng reng-oreng gapaneka ka dhalem ondhem manggiyana Guste Isa e bang-abang. Sampeyan sareng kaula sadaja pas bakal apolonga sareng Guste Isa salanjangnga.