Nɔví lɛ́ɛ mi, Aklúnɔ mǐtɔn Jezu Klísu sín wǐwá, kpó kplé e mǐ ná kplé ɖo gɔ̌n tɔn ɔ́ kpó sín xó ɔ́, è nǎ wá ɖɔ nú mi ɖɔ hwe ɔ́ nu ko su; é sixú nyí mɛɖé, bó ɖɔ Mawu wɛ dó sɛ́n gbɔn jǐ émítɔn, abǐ Wɛn Ɖagbejlátɔ́ ɖé, abǐ è sixú ɖɔ nú mi ɖɔ mǐ ɖésú ko wlán dó wěma mɛ sɛ́ dó. Ényí mi se xó énɛ́ lɛ́ɛ hǔn, mǐ ɖo kɛnklɛ́n dó nú mi wɛ ɖɔ mi ní ma nɔ yá wǔ jó miɖée dó nú ayixa mitɔn ní gbadó ó; xɛsi ma ka ɖi mi ó.
Mi ma lɔn nú mɛɖé blɛ́ mi gbɔn alɔkpa ɖěbǔ mɛ ó, ɖó azǎn énɛ́ ná ko wá cóbɔ gǔfínfɔ́n gǔdo gúdo tɔn ɔ́ na wá yi ǎ; é ná ko wá cóbɔ Mɛdídá e sín kún è nǎ sú dó ɔ́ ná tɔ́n jɛ wěxo ǎ.
É ná lɔn bónú gbɛtɔ́ lɛ́ɛ sɔ́ ná sɛn nǔ e yě nɔ sɛn lɛ́ɛ ɖě ǎ; yě ká sɔ́ ná sɛn nǔ e yě nɔ dó ɖó Mawu ná ɔ́ ɖě ǎ. É ná sɔ́ éɖée ɖó aga, nú nǔ énɛ́ lɛ́ɛ bǐ, bó ná hun káká yi byɔ́ sinsɛnxɔ Mawu tɔn mɛ, bó na jínjɔ́n ayǐ, lobo ná jlá ɖɔ émí nyí Mawu.
É ɖo mɔ̌ có, nǔɖé ka tíin bó hɛn nǔ énɛ́ lɛ́ɛ ɖó te; mi ka tunwun nǔ e wɛ é. Ée nǔ cí mɔ̌ ɔ́, hwenu e Mɛdídá ɔ́ ná tɔ́n dó ɔ́ jɛ́n ná su cóbɔ é ná tɔ́n.
Nɔví lɛ́ɛ mi, mi mɛ e Aklúnɔ yí wǎn ná lɛ́ɛ ɔ́, mǐ ɖó ná nɔ dó kú nú Mawu hwebǐnu ɖó ta mitɔn mɛ. Đó Mawu sɔ́ mi, bónú mi ná nyí mɛ nukɔn nukɔntɔn e é ná hwlɛngán, gbɔn Yɛsinsɛn e zɔ́n bɔ mi nyí étɔn ɔ́ kpódó nǔɖiɖi e mi ɖó nú nǔgbó ɔ́ kpán jí.
Aklúnɔ mǐtɔn Jezu Klísu ɖésúnɔ kpódó Mawu Tɔ́ mǐtɔn e yí wǎn nú mǐ ɔ́ kpó, ní bló bónú mi ní kpan akɔ́n titewungbe; ní ná hlɔ̌nhlɔ́n mi, bónú mi ná nɔ́ wa nǔ e ko nyí nǔ ɖagbe ɔ́ bǐ, ɖo nǔwiwa mitɔn lɛ́ɛ kpódó xóɖiɖɔ mitɔn lɛ́ɛ kpán mɛ. Mawu wɛ na akɔ́nkpinkpan mavɔ mavɔ kpó nukúnɖíɖó ɖagbe kpó mǐ gbɔn fɛ́nú tɔn jí.