Menangka panotop, tan-taretan, pojiyagi kaula sadaja; nyo'onnagi ka Allah sopaja berta dhari Pangeran bisa terros ceppet balattra sareng etarema kalaban sae, akadi se kalakon ka sampeyan gi' dhimen.
Nyo'onnagi jugan sopaja Allah malopoda kaula sadaja dhari reng-oreng se jahat sareng bejjat. Sabab ta' sadajana oreng parcaja ka berta dhari Allah ganeka.
Ban kaula sadaja parcaja ongguwan ka Pangeran parkara sampeyan, ja' sampeyan paneka teppa'na ngalakone ban gi' terrosa ngalakone sadajana se epessennagi kaula sadaja ka sampeyan.
Tan-taretan, kalaban kobasana Guste Isa Almasih, kaula sadaja marenta'agi sopaja sampeyan ajauwi sadajana taretan se males ta' poron alalakon, ban se ta' atoro' ka sadajana pangajaran se etarema dhari kaula sadaja.
Kaula sadaja ta' narema teddha'an dhari oreng ta' kalaban majar. Sabaligga, seyang malem kaula sadaja alalakon amba' pate sopaja ta' marepot pasera'a saos e antarana sampeyan.
Kaula sadaja ngoca' sapaneka polana mereng ja' e antarana sampeyan badha reng-oreng se odhi'na males neng-enneng malolo, ta' alako pa-ponapa salaenna nyampore orosanna oreng laen.
Kalaban kobasana Guste Isa Almasih kaula sadaja marenta'a sareng maenga'a ka reng-oreng ganeka sopaja padha alalakon kalaban taremtem sareng nyare kasabba dibi'.
Olle daddi badha oreng se ta' poron atoro' ka se epessennagi kaula e dhalem sorat paneka. Te-ngate ka oreng se kadi ganeka, ban ja' apolongan pole sareng oreng ganeka, me' olle oreng ganeka todhus.