×

ಪೊಸ ಒಡಂಬಡಿಕೆ

1 ತಿಮೋಥಿ 2

1
ಮಾತೆಡ್ದ್ ದುಂಬು ಮಾತ ನರಮಾನಿಲೆಗಾದ್ ದೇವೆರೆಡ ನಟ್ಟೊಂದು, ಪ್ರಾರ್ಥನೆ ಮಲ್ತೊಂದು, ಮದ್ಯಸ್ತಿಕೆ ಬೊಕ್ಕ ಉಪಕಾರ ಸ್ತುತಿ ಮಲ್ಪೊಡು ಅಂದ್‌ದ್ ಕೇನೊನ್ವೆ.
2
ನಂಕ್ ಸುಖ ಸಮಾಧಾನ ಉಂಡಾದ್ ನಮ ಪೂರ್ತಿ ಭಕ್ತಿಡ್ಲಾ ಮರ್ಯಾದಿಡ್ಲಾ ಜೀವನ ಮಲ್ಪುಲೆಕ್ಕ ಅರಸರೆಗ್ಲಾ ಮಾತ ಅಧಿಕಾರೊಡುಪ್ಪುನಾಕುಲೆಗ್ಲಾ ದೇವೆರೆಡ ನಟ್ಟೊನೊಡು.
3
ಬೊಕ್ಕ ಇಂಚ ಮಲ್ಪುನವು ನಮ ರಕ್ಷಕೆ ಆಯಿ ದೇವೆರೆ ಸನ್ನಿಧಿಡ್ ಎಡ್ಡೆದವುಲಾ ಮೆಚ್ಚಿಗೆದವುಲಾ ಆದುಂಡು.
4
ಮಾತ ನರಮಾನಿಲು ರಕ್ಷಣೆ ಹೊಂದುದು ಅಕುಲು ಸತ್ಯದ ಗೇನೊಡು ಸೇರೊಡು ಪನ್ಪಿನ ದೇವೆರೆನ ಚಿತ್ತ.
5
ದಾಯೆಗಂದ್ಂಡ ದೇವೆರ್ ಒರಿಯೇ, ದೇವೆರೆನ್ಲಾ ನರಮಾನಿಲೆನ್ಲಾ ಒಂಜಿ ಮಲ್ಪುನ ಮದ್ಯಸ್ತೆಗಾರೆಲಾ ಒರಿಯೇ. ಆಯೆ ನರಮಾನಿ ಆಯಿ ಯೇಸು ಕ್ರಿಸ್ತೆನೇ
6
ಆಯೆ ಮಾತೆರೆನ ಬುಡುಗಡೆಗಾದ್ ತನನ್ ಒಚ್ಚಿದ್ ಕೊರಿಯೆ. ಬೊಕ್ಕ ಉಂದು ತಕ್ಕ ಸಮಯೊಡು ಪನೊಡಾಯಿನ ಸಾಕ್ಷಿ ಆದುಂಡು.
7
ಈ ಸಾಕ್ಷಿನ್ ಪ್ರಸಿದ್ಧಿ ಮಲ್ಪೆರೆಗಾದ್ ಯಾನ್ ಸಾರಿಯುನಾಯೆಲಾ ಅಪೊಸ್ತಲೆಲಾ ಆದ್ ನಂಬಿಕೆಡ್ಲಾ ಸತ್ಯೊಡ್ಲಾ ಪಿದಯಿದ ಜನೊಕುಲೆಗ್ ಬೋಧಕೆ ಆದ್ ನೇಮಕ ಆತೆ. ಯಾನ್ ಇಂಚಿತ್ತಿನಾಯೆ ಪನ್ಪಿನ ಸುಳ್ಳು ಅತ್ತ್, ಸತ್ಯನೇ.
8
ಅಂಚಾದ್ ಅಂಜೊವುಲು ಮಾತ ಜಾಗ್‌ಡ್ ಕೋಪಲಾ, ತರ್ಕದಾಂತಿನಾಕುಲುಲಾ ಆದ್ ಪರಿಶುದ್ಧ ಕೈಕ್ಲೆನ್ ದೆರ್ತ್ತ್‌ದ್ ಪ್ರಾರ್ಥನೆ ಮಲ್ಪೊಡಂದ್‌ದ್ ಎನ ಮನಸಾದುಂಡು.
9
ಅಂಚೆನೇ ಪೊಂಜೊವುಲು ಮರ್ಯಾದಿದಾಕುಲಾದ್, ಡಂಭಾಚಾರೊನು ಬುಡ್ದು ಮರ್ಯಾದಿಗ್ ತಕ್ಕದ ಅಂಗಿನ್ ಪಾಡೊನಡ್. ಅಕುಲು ಕುಜಲ್ ನೆಯ್ಪಿನವು, ಬಂಗಾರ ಮುತ್ತು ದಿಂಜ ಬಿಲೆ ಇತ್ತಿ ಕುಂಟುಲೆಡ್ದ್ ತನ್ಕುಲೆನ್ ಅಲಂಕಾರ ಮಲ್ತೊನಂದೆ, ದೇವೆರೆನ ಭಕ್ತಿಡ್ ಎಡ್ಡೆಂತಿನ ಕೆಲಸೊಲೆಡ್ ಐತ ಮಲ್ತೊನಡ್.
10
11
ಪೊಂಜೊವುಲು ಮನಿಪಂದೆ ಇತ್ತ್‌ದ್ ಮಾತೆಟ್ಲಾ ತಗ್ಗ್ ಬಗ್ಗ್‌ದ್ ಇತ್ತ್‌ದ್ ಬೋಧನೆ ಕೇನೊಡು
12
ಬೋಧನೆ ಮಲ್ಪೆರೆಗಾವಡ್ ಅಂಜೊವುಲೆ ಮಿತ್ತ್ ಅಧಿಕಾರ ತೋಜಾವರೆಗಾವಡ್ ಪೊಂಜೊವುಲೆಗ್ ಅಪ್ಪಣೆ ಯಾನ್ ಕೊರ್ಪುಜಿ. ಅಕುಲು ಮನಿಪರೆ ಬಲ್ಲಿ
13
ದಾಯೆಗಂದ್ಂಡ ಆದಾಮುನು ದುಂಬು ಉಂಡು ಮಲ್ತ್‌ದಿನಿ, ಐಡ್ದ್ ಬೊಕ್ಕ ಹವ್ವನ್.
14
ಅವು ಅತ್ತಂದೆ ಆದಾಮು ಮೋಸೊಗು ಬೂರುಜೆ, ಆಂಡ ಪೊಂಜೊವು ಮೋಸೊಡು ತಿಕೊಂದು ಪಾಪೊಡು ಬೂರಿಯಲ್.
15
ಆಂಡ ಪೊಂಜೊವುಲು ಮಾರ್ಯಾದಿಡ್ ಇತ್ತ್‌ದ್ ನಂಬಿಕೆಡ್ಲಾ, ಪ್ರೀತಿಡ್ಲಾ, ಪರಿಶುದ್ಧತೆಡ್ಲಾ ನಿಲೆ ಆದಿತ್ತೆರ್ಡ ಜೋಕುಲೆನ್ ಪೆದ್ದುನೆಟ್ಟ್ ರಕ್ಷಣೆ ಹೊಂದುವೆರ್.
Tulu Bible
New Life Literature
:
Save Notes