×

Ñanderuete Ñe’ẽ Porã 2015

1 Timoteo 4

1
Pe Pytu Porãmbáva voi he’i porãmava’ekue: Umi ára paha gotýo oĩtaha umi opoíva ijeroviágui, ojapysaka hag̃ua umi pytu oporombotavýva ha imbo’epy rehe, oúva umi ángel ñañanguéragui, oñemoĩmava’ekue Satana ndive Ñanderuete rehe.
2
Ha’ekuéra, tovamokõi reheve, omyasãi iñe’ẽ japu, ha’ekuéra omokirirĩse ipy’apy ñe’ẽ oiko hag̃ua Satana rembiguái ramo.
3
Ha’ekuéra ojoko umi omendasévape, ani hag̃ua omenda, ha oĩ tembi’u ha’ekuéra ndohejáiva oje’u, ko’ã tembi’u Ñanderuete ojapova’ekue opaite ojeroviávape g̃uarã ha oikuaávape guive pe añetegua, ho’u hag̃ua agradecimiénto reheve.
4
Iporãmba ningo opaite mba’e Ñanderuete ojapóva guive, ha mba’eve ndaivaíri oje’u ramo agradecimiénto reheve,
5
ko’ã tembi’u oñemboykégui Ñanderuetépe g̃uarã, Ñanderuete kuatiañe’ẽ ha ñembo’e rupi.
6
Ko’ã mba’e nde rehekombo’e porã ramo, ñane hermanokuérape nde reikóta Hesu Crísto rembiguái porãva ramo; emongakuaa porã nde rekove, jerovia ñe’ẽ ha tekombo’e añeteguáva rupi, ko’ãva taha’e ne rembi’u porã.
7
Emboyke yvyarigua ñemombe’u rei (cuénto); umía ojogua umi ñe’ẽ reípe kuña ig̃uaimíva sapy’a py’a omombe’úva.
8
Eñeha’ãmba katu nde reiko hag̃ua tapia Ñanderuete ndive ha ejejokókena Ñanderuete rehe opaite mba’épe.
9
Ko ñe’ẽ kóva añetegua ha iporã opavave oñemomba’e hag̃ua hese.
10
Upevarã romba’apo ha roñeha’ãmba, romoĩgui ore esperánza Ñanderuete Oikovévare; Ha’e ningo osalváse opavavépe, osalváma katu umi ojeroviávape hese.
11
Ejapouka ha eporohekombo’e ko’ã mba’e rehe.
12
Anítei avave nde’apo’i, eñeha’ãmba katu eiko tekove potĩme, nde karia’ýpe reme’ẽ ejémplo porã umi ojeroviávape g̃uarã: Ne ñe’ẽ rupi, nde reko porã rupi, ne mborayhu añete rupi, nde jerovia rupi, nde reko potĩ rupi.
13
Che aju peve, emoñe’ẽ pe kuatiañe’ẽ, emoangapyhy, emokyre’ỹ ha ehekombo’e (hermanokuérape).
14
Ani remboyke nde Pytu Porãmbáva me’ẽmby, oñeme’ẽmava’ekue ndéve peteĩ profecía rupi, umi karai anciáno, omoĩ ramoguare ipo ne akã ári.
15
Eiporu katu ko nde Pytu Porãmbáva me’ẽmby, opavave ohechakuaa hag̃ua nde jerovia okakuaaveha ohóvo nde rekovépe.
16
Eñangareko ndejehe ha umi mba’e reporombo’éva rehe, epyta ipype, rejapórõ upéicha, Ñanderuete omoañetéta nde salvacion ha umi nerendúvape avei.
Guarani Bible 2015
Ñanderuete Ñe’ẽ Porã MISIÓN ALEMANA ENTRE LOS NATIVOS DEL PARAGUAY - HARALD FÜRSTENAU, 2015
:
Guardar notas