Châhrasala nôhmei cha sawzy tlyma, samohzy tlyma a hnei khiahta cha, Khazohpa chyhsa ama châna cha ama chhôhkha liata palâsa ei sala, ama nôpawzy chyh awpa ta a chu tua mawh ei sy. Cha cha Khazohpa alynazie a châ.
Sanawh a chyh leipa chyhsa, a eih pachaipa ta a chhôhkhazy a chyh leipa chyhsa cha, ngiapâna a paphasaipa châ ta, ngiapâleipa hlâ chhao ta a chhie via.
a sawzy a mohôhpa, khichhai a pasôpa, mopathaihpazy phei a pasipa, chyhsa nôpopazy a deichhypa nata hmo pha to taona liata a hmâhpa, hmo pha taona kyh liata reithai a hlaopa a châ khiahta cha, nôhmeizy hry liata pahlaopa châ mawh sy.
Nôhmei hawti viapazy deikua cha, nôhmei hry liata pahlao khah y. Krista châta amâ piena hlâta ama sapa khona a vaw lai via nahta, vahpa hnei awpa ama khoh tyh.
Cha dei châ vei, thathipa ta y ei ta, o to ta amâ khiekhâ tyh. Ama thathipa dei châ leipa ta, chyhsa kyh reih ei ta, biethâhzy taopa ta, rei lei awpazy ama reih tyh.
Chavâta nôhmei hawti viapazy cha, dyhchâ ei sala, sawzy hneipa ta, ama chhôhkhazy mohôh ei sala, sei nawpa rypaohpa khakhaipa hnohta ama pie lei awpa ei khoh.
Ngiapâtuhpa chanô ta sanawh nôhmeizy a hnei khiahta cha, âmo cha ano ta deichhy mawh sy. Awnanopa phao a pahri awpa châ vei. Chatanachata Awnanopa ta nôhmei hmeiseihpazy a deichhy thei aw.
He ryhpazy he thailei pachâsa chhieliena y leipa ta, khokhei eih viapa hnei hra leipa ta hmâh awpa ta, Khazohpa nata Krista Zisu nata vâlyuhchâpa atlyhpazy mohmô liata bie ei cha pie.