×

أَتَّوْرَتْ دَ أَنَّبَاوَا 2020

1 Timoti 6

1
دُكْ وَطَنْدَ سُكٜىٰ ڧَرْڧَشِنْ غُنْ‌غُمٜىٰنْ بَوْتَا، سَيْ سُبَا إِيَايٜىٰنْ‌غِجِنْسُ ثِكَكّٜىٰنْ بَنْ غِرْمَ وَنْدَ يَدَاثٜىٰ، دُواْمِنْ كَدَ عَيِ مَغَنَرْ رٜىٰنِ غَ سُونَنْ اللَّهْ تَرٜىٰدَ كُواْيَرْوَرْمُ؞
2
كَدَ بَايِ وَطَنْدَ إِيَايٜىٰنْ‌غِجِنْسُ مَاسُبِنْ عِيسَىٰ نٜىٰ سُيِ مُسُ رَشِنْ بِيَيَّ، عَكَنْ ثٜىٰوَ سُو إِيَايٜىٰنْ‌غِجِنْسُ یَنْعُوَنٜىٰ ثِكِنْبِے؞ أَ مَيْمَكُوانْ حَكَ، سَيْ سُڧَارَ ڧُواْڧَرِ تُنْدَيَكٜىٰ إِيَايٜىٰنْ‌غِجِنْسُ، وَطَنْدَ سُكٜىٰ سَامُنْ أَمْڢَانِنْ عَيْكِنْسُ مَاسُبِينٜىٰ، كُمَ وَطَنْدَ عَكٜىٰڧَوْنَ؞ لَلَّيْ نٜىٰ كَكُواْيَرْ، كَكُمَيِ غَرْغَطِے عَكَنْ وَطَنَّنْ أَبُبُوَ؞
3
دُكْ وَنْدَ يَكٜىٰيِنْ كُواْيَرْوَا دَبَمْ وَدَّ بَتَكُمَ يَرْدَ دَ عَيْنِحِنْ كَلْمُواْمِنْ عُبَنْ‌غِجِنْمُ عِيسَىٰ أَلْمَسِيحُ بَ دَ كُمَ كُواْيَرْوَرْ دَ بَتَدَاثٜىٰ دَ بِنْ حَلِ إِرِنْ نَ اللَّهْ بَ،
4
وَنَّنْ يَنَ ثِكٜىٰ دَ غِرْمَنْ كَيْ، بَيْ كُوَ سَنْ كُواْمٜىٰبَ؞ يَنَ كُمَ دَ حَلِنْ مَرْمَرِنْ غَرْدَمَ دَ مُهَوَرَ غَمٜىٰدَ كَلْمُواْمِ؞ أَيْ، وَنَّنّٜىٰ يَكٜىٰ حَيْڢَرْ دَ كِيشِ دَ ضِكِثِ دَ ٻَاتَ سُونَ دَ مُوغَيٜىٰنْ ظَثٜىٰ ظَثٜىٰ،
5
دَ يَوَنْ غَرْدَمَ تَرٜىٰدَ وَطَنْدَ تُنَانِنْسُ يَذَمَ بَنْظَ، غَسْكِيَ كُمَ تَغُجٜىٰ مُسُ؞ وَطَنَّنْ سُنَ غَنِنْ بِنْ اللَّهْ وَتَ حَنْيَثٜىٰ تَسَامُنْ أَرْزِڧِ؞
6
بَابُ شَكَّ! أَݣَويْ بَبَّرْ رِيبَ ثِكِنْ ذَمَنْ حَلِ إِرِنْ نَ اللَّهْ تَرٜىٰدَ ݣُونْثِيَرْ رَيْ؞
7
غَمَا بَمُ شِغُواْ ثِكِنْ دُونِيَا دَ كُواْمٜىٰبَ، حَكَمَا بَذَامُ عِيَ ڢِتَ ثِكِنْتَ دَ كُواْمٜىٰبَ؞
8
عِدَنْ دَيْ مُنَدَ عَبِنْثِ دَ رِيغُنَنْ سَاوَا، وَنَّنْ مَا يَا إِسَ؞
9
عَمَّا وَطَنْدَ سُكٜىٰ مَرْمَرِنْ يِنْ أَرْزِڧِ سُكَنْ ڢَاطَ ثِكِنْ جَرَّبَ، ثِكِنْ تَرْكُواْ نَمُوغَيٜىٰنْ شَعَوَثٜىٰ شَعَوَثٜىٰ إِرِ إِرِنَّبَنْظَ دَ نَثُوتَرْ دَ وَطَنْدَ سُكَنْ شَا كَنْسُ، سُجَٰوُاْسُ ذُوَاغَ لَلَثٜىٰوَ دَ هَلَّكَ؞
10
غَمَا ڧَوْنَرْ كُطِ عِتَثٜىٰ تُوشٜىٰنْ كُواْوَثٜىٰ إِرِنْ مُغُنْتَا؞ عَثِكِنْ مَرْمَرِنْ يِنْ أَرْزِڧِ دَ سَوْرِ، وَطَنْسُ سُنْ رَبُ دَ بَنْ‌غَسْكِيَرْسُ حَرْ سُكَ جَٰوُاْ وَكَنْسُ بَڧِنْ ثِكِ إِرِ إِرِ مَاسُ ذَاڢِ؞
11
عَمَّا يَا كَيْ تِمُواْتِ، كَيْ نَ اللَّهْ نٜىٰ، سَيْ كَغُجٜىٰ وَدُكَنْ وَطَنَّنْ أَبُبُوَ، كَسَا كَيْ غَ نٜىٰمَنْ أَدَلْثِے دَ كَسَنْثٜىٰوَ دَ حَلِ إِرِنْ نَ اللَّهْ دَ بَنْ‌غَسْكِيَ دَ ڧَوْنَ دَ جِمْرٜىٰوَ دَ كُمَ تَوَلِعُ؞
12
كَيِ ݣَكْݣَوَرْ ڟٜىٰرٜىٰنَّنْ، وَتُواْ ڟٜىٰرٜىٰ نَبَنْ‌غَسْكِيَ؞ كَكَرْٻِ لَادَ نَرَيْ مَدَوَّمِ، وَنْدَ عَكَ كِرَاكَ دُواْمِنْسَ، وَنْدَ كُمَ كَيِ ݣَكْݣَوَرْ شَيْدَ عَكَنْسَ أَغَبَنْ شَيْدُ مَاسُيَوَ؞
13
إِنَ عُمَرْتَرْكَ أَغَبَنْ اللَّهْ وَنْدَ يَكٜىٰ بَادَ رَيْ غَ دُكَنْ كُواْمٜىٰ دَ كُمَ أَلْمَسِيحُ عِيسَىٰ وَنْدَ عَثِكِنْ شَيْدَرْسَ أَغَبَنْ بُنْتُسْ بِلَتُسْ يَيِ ݣَكْݣَوَرْ شَيْدَ،
14
كَكِيَايٜىٰ عُمَرْنِنَّنْ بَاتَرٜىٰدَ كَذَمَ أَبِنْ زَرْغِ كُواْ لَيْڢِے بَ، حَرْ سَيْ عُبَنْ‌غِجِنْمُ عِيسَىٰ أَلْمَسِيحُ يَبَيَّنَ؞
15
وَنَّنْ بَيَّنَرْ كُوَ اللَّهْ ذَيْسَا تَكَسَنْثٜىٰ أَدَيْدَيْ لُواْكَثِ؞ اللَّهْ وَنْدَ شِ كَطَيْ نٜىٰ مَيْ إِيكُواْ دُكَ مَيْ أَلْبَرْكَ، سَرْكِنْ سَرَاكُنَ دَ عُبَنْ‌غِجِنْ إِيَايٜىٰنْ‌غِجِ ،
16
وَنْدَ شِ كَطَيْ نٜىٰ مَرَرْ مُتُوَ، مَيْ كَسَنْثٜىٰوَ عَثِكِنْ حَصْكٜىٰنْ دَ بَاوَنْدَ يَنَ عِيَ كُسَدَشِ؞ شِينٜىٰ وَنْدَ بَابُوَنِنْ دَ يَتَٻَ غَنِ، كُواْ يَ عِيَ غَنِ؞ أَغَرٜىٰشِ غِرْمَ دَ مُلْكِ مَرَرْ ڧَارٜىٰوَ سُتَبَّتَا؞ أَمِينْ؞
17
كَا عُمَرْثِ وَطَنْدَ سُكٜىٰ دَ أَرْزِڧِ عَدُونِيَرْ نَنْ ثٜىٰوَ كَدَ سُطَغَ كَيْ كُواْ سُسَا ذُوثِيَارْسُ عَكَنْ أَرْزِڧِ مَرَرْ تَبَّتَا؞ عَمَّا سُسَا ذُوثِيَارْسُ غَ اللَّهْ وَنْدَ يَكٜىٰ تَنَدَ مَنَ كُواْمٜىٰ عَيَلْوَثٜىٰ دُواْمِنْ جِنْ دَاطِنْمُ؞
18
كَاعُمَرْثٜىٰسُ سُنُونَ أَلْحٜىٰرِ، سُيَلْوَتَ ثِكِنْ يِنْ أَيُّكَ مَاسُ ݣَوْ، سُكَسَنْثٜىٰ مَاسُ بَايَرْوَ حَنُّ سَكٜىٰ، سُنَ تَيْمَكُوانْ وَطَنْسُ؞
19
تَهَكَ ذَاسُيِ وَكَنْسُ أَجِيَ وَدَّ ذَاتَذَمَ تُوشٜىٰنْ رَايُوَا مَيْ ذُوَا، دُواْمِنْ سُكَڢُ ثِكِنْ رَيْ وَنْدَ شِينٜىٰ عَيْنِحِنْ رَيْ؞
20
يَا تِمُواْتِ، كَلُورَ دَ أَبِنَّنْ دَ عَكَ بَاكَ أَمَانَ؞ كَوَارٜىٰ كَنْكَ دَغَ مَغَنْ‌غَنُنْ بَنْظَ نَرَشِنْ ڟُواْرُوانْ اللَّهْ دَ شِغَ ثِكِنْ وَوَنْثِنْ غَرْدَمَ تَرٜىٰدَ مَاسُ غَابَادَكَيْ، مَاسُ مَغَنَ غَمٜىٰدَ حَنْيَرْ دَ عَكٜىٰ طَوْكَ وَيْ عِلِمِ نٜىٰ، عَمَّا ڧَضْيَا نٜىٰ؞
21
تَوُرِنْ بِنْ وَنَّنْ كُواْيَرْوَا، وَطَنْسُ مُتَنٜىٰ سُنْ رِغَا سُنْ رَبُ دَ حَنْيَرْ بَنْ‌غَسْكِيَ؞ أَلْحٜىٰرِ يَكَسَنْثٜىٰ تَرٜىٰدَكُو؞ أَمِينْ؞
Hausa Bible Arabic 2020
Hausa Common Language Ajami Bible The Bible Society of Nigeria, 2020
:
Adana Bayanan kula