Piipl onggl a-go bizniz wid demself an dem a-go lov moni. Dem a-go gwaan buosi-buosi an ful-a demself. Dem a-go kos out an biit op biit op dem wan aneda an dem naa go fala wa dem mada an faada se. Piipl naa go gi tangks fi notn an dem naa go av notn fi du wid Gad.
Dem naa go lov dem wan aneda ar notn we gud. Dem a-go taak bad bout dem wan aneda tu. Iina di laas die dem, piipl naa go av no kanchuol uova demself an dem a-go gwaan laik dem a wail daag.
Dem a-go ton chrieta an dem a-go du bie kielis sitn. Piipl iina di laas die dem a-go gwaan laik dem beta dan evribadi els. Insted-a lov Gad dem a-go lov fi du di sitn dem we dem tingk a fon, iivn ef Gad se dem no fi du dem.
Siem wie Janis an Jambres did go gens Muoziz, a siem wie dem man ya go gens di chuut. Dem faalz tiicha ya, dem main mes op an dem naa tingk chriet. Dem man ya a fiek, dem a no riili Gad piipl.
Bot yu Timoti, yu fala wa mi tiich an yu fi liv yu laif laik ou mi liv fi mi laif. Yu nuo wa mi waahn fi du an wa mi biliiv iina. Yu si ou mi lov piipl an ou mi put op wid chobl an neva tap no mata wa.
Yu nuo bout aal a di sitn dem mi did afi go chuu an ou mi did sofa iina Antiyak, Aikoniyom an Lischra. Mi go chuu aal a dem sitn de an Gad bring mi chuu di uol a dem.
Evri wod we iina Gad wod kom fram Gad. An da Wod de gud fi tiich piipl an fi put piipl iina dem plies wen dem staat se tingz we no iina Gad wod. It gud fi karek piipl an fi tiich dem ou fi liv rait.