मूसा का द्वारा दीईना का नियम-कानून केवल उन निकी चीजून की एक छाया मात्र छै जो भविष्य में ऊँन वाली छै, यो असली में नाहातिन। येक कारण, जो लोग नियम-कानून का अधीन रूनान उन हर साल एक जसो बलिदान चढ़ूना, लेकिन यो बलिदान उन लोगून कभै ले सिद्ध नै बना सकनो जो परमेश्वरा अराधना करून खिन उक नजदीक उनान।
येक कारण जब मसीह संसार में आछ, त उले परमेश्वर थैं क्योछ, “तै नै चाँनै कि लोग तैंस बलिदान और भेंट चढ़ून, लेकिन तैले मैंस बलिदान करून खिन एक शरीर दी रैछ।
फिर उले क्योछ, “हे परमेश्वर देख, मैं उई करून खिन आरयूँ जो तै चाछै।” परमेश्वर बलिदानून की पैला नियम-कानून खत्म कर दीछो ताकि उ एक नय्या नियम-कानून स स्थापित कर सको। और येक कारण, हम उ बलिदान का द्वारा पवित्र कर दी ग्या जो यीशु मसीह ले अपून शरीराक द्वारा एक बार में हमेशा खिन चढ़ा दी ग्यो।
हेरक याजक हर रोज वेदी का सामुनि ठाड़ हो भेरन लोगून का पापून दूर करून खिन नियमून पुर करछो। उ लगातार एक्कै जसो बलिदानून चढ़ूनै रूछो जो कभै ले उ आदिमी का पापून दूर नै कर सकनो, जो उनून खिन करि ग्यान।
लेकिन हमार महायाजक यीशु मसीह ले हमार पापून की माफी खिन अपूनास हमेशा खिन सिर्फ एक बलिदान का रूप में चढ़ा दीछ। और अब उ पिता परमेश्वरा का दैन तरफ सिंहासन में सर्वोच्च सम्मान का जाग में हमेशा खिन बैठ ग्योछ।
किलैकी मसीह ले अपूनास सिर्फ एक बार बलिदान का रूप में परमेश्वरेस दी दीछ और यो कारण उक लोगून पवित्र कर दी ग्योछ और उन सच्ची में हमेशा खिन धर्मी बन ग्यान। और वाँ एल उ अपून सब दुश्मनून पुर तरीका ले अपून अधीन करून खिन इंतजार करूनमर्योछ।
फिर प्रभु कुंछो कि, जो नय्या वाचा मैं उन दिनून का बाद इस्राएल का लोगून का दगाड़ करूँलो, उ यो छै कि “मैं अपून नियम-कानून उनार दिलून में लिखूलो और मैं उनार जमीर में डाललो।”
जब मसीह मरछ्य त उले हमून खिन एक नय्या बाटो खोल दीछ ताकि हम इसो जीवन जी सकाँ जैको कोई अन्त नाहातिन। उले यो बाटो पर्दा भटे निकभेरन खोलछ्य, येको मतलब यो छै कि उले अपूनास एक बलिदानाक रूप में चढ़ाभेरन
त आ हम, मसीह का खून का छिड़क भेरन अपून मनैस शुद्ध करभेरन और साफ पानि ले अपून शरीरून धोभेरन साफ करभेरन और सच्चा मन और मजबूत विश्वास का दगाड़ परमेश्वरा का नजिक जा।
आ हम कुछ लोगून का नियाती, परमेश्वरै की अराधना करून खिन इकट्ठा हुनो बन्द जन करा। लेकिन हमून एक-दुसरा स हौंसला दीनै रून चैछो और चेतावनी दीनी चैछी, खास कर अब जब कि प्रभु का फिर वापस उनाक दिन नजदीक ऊँन मर्यान।
अगर मूसा का नियम-कानून का अनुसार तरीका की सजा छी, त उ आदिमी की सजा भौत ज्यादा होलि जो परमेश्वरा का च्याला को अपमान करछो। उले परमेश्वरा का च्याला स अपून खुटान ले कुचल दीछ किलैकी उले उक आदर-सम्मान नै कर्यो। उले मसीह का उ खून स पवित्र नै मान्यो जैका द्वारा परमेश्वरेले ऊस पवित्र बनून खिन नय्या वाचा शुरू करिना की छी। उले पवित्र आत्मा को अपमान करछ्य जैका द्वारा उस अनुग्रह मिलीना को छ्यो।
ऊस भौत कड़ी सजा दी जालि, किलैकी हम जाणनू कि परमेश्वरेले कईना को छै, “बदला लीनो म्येरो काम छै, मैं ही बदला द्यूलो।” और फिर यो ले कईना को छै, कि “प्रभु अपून लोगून को न्याय करोलो।”
लेकिन तुम उन दिनून का बारिमें सोचा जब तुमूले पैलि बार मसीह का बारिमें जाणछ्य। तुमूले भौत दुखून का दगाड़ कठिन मेहनत करछ्य, लेकिन तुम विश्वास में मजबूत बनिना का रैछा।
कभै-कभै त इसो ले भ्योछ, कि तुम अपमान, और अत्याचार सह भेरन सबून का सामुनि तमाशा बनग्या, और कई बार तुम उन लोगून में शामिल हो गया जिनोरो अपमान करि जा छ्यो और जिनारा दगाड़ बुरा बरताव हुछ्यो।
तुम कैदीन का दुख में ले दुखी भैछा, और अपूनी धन-दौलत ले खुशी ले लुटा दीछ; किलैकी तुम जाणछा कि तुमार पास एल ले उन सब चीज छन जिनोरो वादा परमेश्वरै करिना को छ्यो, जो कि भौत खास छै और जो हमेशा खिन बनिना को रूछो।
उक बाद परमेश्वर तुमून उ द्योलो जैको उले वादा करिना को छै। किलैकी, पवित्रशास्त्र में लिखीना को छै, “अब भौतै कम बखत रै ग्योछ, जब कि ऊँनवालो आलो, और देर नी करोलो।
हम उन लोगून में भटे नाहातिन जो परमेश्वर में विश्वास करून छोड़ दीनान और नाश हो जानान, लेकिन हम उन लोगून में भटे छा जो अपून विश्वास का द्वारा जीवन पा लीनान।