Mam Ekisil Kiyaudin kerait aputo nakajokan naka iboro luka abeite; erait usa akitodiaret naka iboro kalukajokak kalu ebuto. Isuban kwipe kwi lu elemunono ng'ini pak ikaru kere. Ikoni konye Ekisil ebeikini akitalaun itung'a lu ebunete nama ka Akuju ayi?
Na sodit, abu nesi kotema, “Mam ijo kikote bobo mam kitalakarito ijo isuban kiton idutan kere kityeng' lu kicwa ka altari nepepe ka isuban lu elemarete arokusio.” Abu nesi kotema nu konye isuban lu kere elemunono atupa ka Ekisil.
Kosodi nesi atemar: “Okwai Akuju, ajii eong' ne alokokina asoma nu ikote ijo.” Kanuka ng'unu, inyekini Akuju isuban kere lumojong' kosodi nesi akipiakin agogong'u nama ka Kristo, isubanit ni kiareit.
Kanu esoma Yesu Kristo nu akote Akuju kisoma nesi kisoma, kitalauno oni kere karokusio atupa ka edutat loka akwana keng' lo abu nesi kolemu katipe bon bobo kanuka itung'a kere.
Ebala Lokapolon, “Na nes akitutuket na alosi eong' akipiakin ka kesi apaarasia nu ebuto. Epiakini eong' ikisila kang' otawon kes ka akigirakin adama kes.”
Mam oni akinyekin ekitoki loka atukonokin nenipe kwape isomata itung'a luce. Konye kesicasitete luce cut naarai iteete osi apuuti apaaran ka Lokapolon.
Abo konye ng'ulu lu enwang'ito Okoku ka Akuju? Lu itebebenito aokot nuka akitutuket ka Akuju nu etalaunete kesi karokusio? Lu erasete Emoyo loka asianut? Kiitutu bere ekipone lo eronarere akisicanio na edumunete kesi!
Naarai ijaasi osi kakisoni lukeyenite, bobo kocamunete osi kalakara ademario iboro kus naarai ijenete osi ebe kijaasi osi ikulopek ka abara na elae noi bobo na mam kedaun.