Derjch Gloowe brocht Abel Gott een bätret Opfa aus Kain, derjch daut hee Zeijniss tjreajch, daut hee jerajcht wea, enn däm Gott Zeijniss jeef too siene Gowe; en doaderjch, wann hee uck jestorwe es, räd hee noch.
Derjch Gloowe word Heenoch entdretjt *wajch jenohme, doamet hee dän Doot nijch sach, en hee word nijch jefunge, wiel Gott am *entdretjt haud; dan ver de Entdretjung haud hee daut Zeijniss jehaut, daut hee Gott jefolle haud.,
Derjch Gloowe büd Nooha, aus hee eenen jettlijchen Ütspruch äwa daut, waut noch nijch too seene wea, emfange haud, von Ferjcht bewäajcht, büd eene Arjche omm sien Hüs too rade, doaderjch hee de Welt veüadeeld en Oaw de Jerajchtijchtjeit word, dee no däm Gloowe es.
Derjch Gloowe wea Obraum, aus hee beroope wort, jehuarsom, wajch too tratje aun dän Uat, dän hee tom Oawgoot emfange sull; en hee trock üt, ohne too weete, wua han hee tjemmt.
Derjch Gloowe hilt hee sich em Vesproaknem Laund opp, aus enn eenem framden, en wohnd enn Zelte met Iesak en Joakopp, dee Metoawe de selje Vespräatjung;
Derjch Gloowe tjreajch uck Sara selfst Krauft, eenen Some too jrinde, en zwoa äwa de jeeajende Tiet vom Ella rüt, wiel see dän trü acht, dee de Vespräatjung jejeeft haud.
Doawäajen send uck von eenem, en zwoa erstorwnen, jebuare worde aus de Stearn aum Himmel aun Menj, en aus de Saund aum Eewa vom Mäa, dee nijch too tale jeit.
Dise aule send em Gloowe jestorwe en ha de Vespräatjunge nijch erlangt, sonda sache see von wiet en bejreeste ahn en betjannde, daut see Framde en ohne Birjaschoft oppe Ead em Laund send.
Oba nü sträwe see no eenem bätren, daut es nom himmlischen. Doawäajen schämt sich Gott äara nijch, äa Gott jenant too woare, dan hee haft ahn eene Staut reed jemoakt.
Derjch Gloowe word Mooses, aus hee jebuare wort, dree Moonat von siene Ellre vestoake, wiel see sache, daut et Tjint scheen wea; en see ängste sich nijch fe däm Befäl vom Tjeenijch.
Wiewa tjreaje äare Doodje wada derjch Oppstohninj; oba aundre worde jefoltat jetjwält, doa see de Befrieung nijch aunnauhme, doamet see eene bätre Oppstohninj erlange.