Ki igoochi Abel Kamuktaindet eng' kayaneet tiseiywot ne myee kosiir ne po Kain, ne ki kibaoryanjine ineendet keele ki po imanda, ak kibaoryan Kamuktaindet agobo kagoochinoikyik: ak eng' nooto, agot nganda ki kome kota kong'alaali.
Ki kimut Enok eng' kayaneet si ma keer meet; ak ki mata kogeer chii ineendet, amu ki imut Kamuktaindet: amu ye kitom kimut ko kiga kibaoryan agobo ineendet keele ki ibaibai Kamuktaindet;
ak ngo ma mi kayaneet koma imugaksei kibaibai ineendet: amu ineendet ne riikyin Kamuktaindet konyaaljin koyan kole mi ineendet, ak kole igoochin melekto icheeget che cheeng'ei ineendet.
Ki yai Noah moinget eng' kayaneet, kot kosar koonnyi, ye kingo kagiteechi agobo tuguuk che ki tomo kegeer, amu ki iywei Kamuktaindet; ki irwookyine anyun ng'wony nooto, ak ki ek ne ki nam imanda ne piitu eng' kayaneet.
Ki ek eng' kayaneet kiprutoiyot eng' emetap arorutyet, ko uu emet ne ma nenyi, komeng'ooti emaisyek, kobooto Isak ak Jakobo, che ki che namei arorutyonooto kobooto ineendet:
nooto anyun ki kisich eng' agenge, ne kiga koigei ne ki kome, piik che chaang', ko uu kecheigap kipsengwet ak ng'aniek che mi ngeguutap nyanjet, che ma iitoksei.
Ki pek chuuto tugul eng' kayaneet, ama taach arorutichooto, ago kiga kogeer ak koboiboitu kota komi ole loo, ko kagong'aany kole ki toek ak ko kiprutoinik eng' ng'wony.
Ago machei kot nguno emet ne karaaran kosiir nooto, nooto ko, ne po kipsengwet: nooto anyun ma keerei Kamuktaindet kalilanet agobo icheek keguure Kamuktaindet nenywa: amu Ki kochopchi icheek nganaseet.
Ki uny sigiikyik Musa eng' kayaneet eng' arawek somok kingo kagesich, amu kiga keer kole ki lakweet ne karaaran; ak ki ma iywei ng'atuutyetap laitoryat.
Kitaach kwonyiik piikwak che kiga kobek, che ki king'eet: ak ki kibir alak kot kobek, koesyoi katyagennywa; si kobiit kosich ng'eetyeet ne myee kosiir:
ki kilach eng' koik, ki kimurmure musumenosyek, ki kiyoom, ki kibare rotwetap chok: ki ilaagoti ngoroigap keechiirek, ak che po ng'oroorek, kobonondos, ki kinyalili, keyachin ne ya