Ngakhala ndi tenepo, na ifembo, na thangwi ya kuzungulirwa na mwinji uyu ukulu wa amboni, mbatisiyeni pyonsene pinatipingiza, pontho na madawi anatimanga. Mbatithamangeni na phinga yonsene pa ndima idapaswa ife,
mbatilang'anisa maso athu kuna Yezu, adatoma na kumalisira cikhulupiro cathu. Na kutsandzaya kukhadakoyerwa Iye, apirira nyatwa ya pa ntanda, mbakhonda kutsalakana manyadzo, pontho mbakhala ku nkono wa madyo wa mpando wa Umambo wa Mulungu.
Pontho ife tikhali na ababa athu a pa nyama, akhatisandika ife mbatikhaalemedza. Apo ndiye tani, ife nkhabe kufunika tim'bvere Baba wathu wa munzimu, toera tikhale na upulumuki?
Wangisirani kukhala mu ntendere na onsene, pontho mbamuperekeka kuna Mulungu. Thangwi mungakhonda kuperekeka kuna Mulungu, nkhabe munthu anadza kaona Mbuya.
Mbwenye imwe mwafika ku phiri ya Siyau, ku Djerusalema ya kudzulu, ku nzinda wa Mulungu wa m'maso, mwafika kuna pikwi na pikwi pya maanju pa nsonkhano wakutsandzaya,
pa gereja ya ana a utombo a Mulungu, ale adalembwa madzina awo kudzulu. Mwafika pana Mulungu, ntongi wa miseru ya anthu onsene. Mwafika kuna mizimu ya anyakulungama akukwana.