Tanaikisi daang na eriebete ngitai kus iyenete atamar eraakasi ngakiro na kitatamete esi, idodiunito na kiriebete esi ngitai atamar kimarunit Akuj esi atamar iraakasi talokookeng. Eyei ikoku nakanuan ni nyidesit apakeng a?
Aloger kata a apayok alu kuurunete ngoni, kideese kesi ngoni sodi atokera ngoni kesi. Kongina pei, ejoikinit ngoni kikeri noi Apayok alopit a etau sodi atoyareta!
Kiriraate ngoni ta apayok lu kuurunete ngoni a ngirwa a ngidikidio make, alopit alo ajoikinit kesi, nakaneni kirirae ngoni Akuj sodi ataanyuneta ngoni akitaleuno keng.
Nakiriraare ngoni, esubuni mono ibore nikitisinyi ngoni, meere ni kitalakari. Ani ekisidi, ngulu etenikin loger ngolo, eanyunete ebachit lo ekisil lo erai eboyor lo etenoono.
Tochoikinos sodi nyiibatarosi anajokis a Akuj. Warasi nyeemin itwaan ni ikoni ekitoe loadwaran lo erupuni sodi kisiak ngichan, toliworos ngikaalak lu nyitaleuno kotere ngichan ngulu.
Warasi nyeemin itwaan nimalaat kori ni nyekerit Akuj loger a Esau, alo kolong agialari apolou keng na araakar ikoku ni ekingaren kotere akimujet apei bon.
Nyepona esi loger lo kolong aponeta Ngisirael. Nyepona esi nibore ni epedorio akitap, kori ni ikoni emoru a Sinai lo ewari asarae, kori aribu ka akirionut kori ekuwam,
Nakaneni ipot esi moru a Sion, ni eyei ere lo a Akuj ana eyari. Inanga esi Yerusalem lo erai ere a Akuj, ni echunakina ngimalaikae lukaalak lu emam ekimar.
Ipot esi ni echunakina talokookeng a Akuj lu a ekingaren lu igiritae ngirora kech nadis. Ipot esi nia Akuj ana irirae ngitunga daang ka ngitai a ngitunga aluajokak alu etiliwor lu ikiuna.