जे माणसे तुंद्रे घर आवे, तींद्री मेजवानी करनु घुण भुलु; काहाकी थुड़ाक जणा अंजाण्या माणसेन मेजवानी कर्या, ने अळी तीनुक मालम पड़्यो की, हामु ते जाणे बीगुर भगवानेन सरग वाळा चाकर्यान मेजवानी कर देदला।
हामु बी जेल मां छे, असो समजीन ईसु पर भुरसु करन्या केदड़ान मदत करने घुण ईसेरजु। ने हामरो डील बी दुख झेलन्योत छे समजीन ईसु पर भुरसु करन्या काजे, दीसरा माणसे वेला पाड़े, ती तींद्री मदत करने घुण ईसेरजु।
भगवान, छीनाळ्यान ने दीसरान बायरीक धरन्यान नीयाव करसे, ने डंड आपसे। हेरेसी आखा माणसे मां ईयाव ईज्जत सी हवणु चाहजे। ने दुयु माणसे काजे एक दीसरा पर भुरसु करे असु जीवन, जीवणु चाहजे।
जे तुहुं काजे भगवानेन खुस-खबर सामळायन तुंद्री अगवाय कर रया, तीनु काजे तुहुं हेर राखु; ने चे कसा भुरसान जीवन बेसकी वारु जीवीन पुरी कर्या; तसात तुहुं बी भगवान पर भुरसु करीन जीवु।
मंडळीन पुडार्या, तुंद्रा जीव वाटे रात दाहड़ु फीकुर करीन जागली करीन दुवा करता रवे, ने अगवाय करे। तीनुक ते तुंद्रो जीव सुदारनेन जो काम भगवान सुपलु तेरु हीसाब किताप भगवान काजे आपणु पड़से। हेरेसी तींद्री मानु; ने तींद्रे अनुसार चालु, ने तीनु काजे ज काम खुसी सी करने देवु, दुखी हय्न नी काहाकी दुखी हय्न जो काम करसे ती, तुंद्रा जीव काजे काय बी नफु नी हये।
जुत सांती आपण्यु भगवान तुहुं काजे आखी भली वात मां बड़ाया करे। तेरे सी तुहुं भगवानेन मरजी पुरी करु, ने ज काय भगवान काजे चाहजे च काम करु। भगवान आपणा जीव मां जो आखो काम ईसु मसीन साहरेत पुरो करे। ने ईना ईसुन बड़ाय जलम पीड़ीडीट हवती रहणु चाहजे। आमीन।