Yanakanyani lavanga majele, kufana ni loko ingi na n'wina mi le jele na vona; kutani ni lava vaxanisiwaka, mifanele kutitwa na mili na vona, hikuva na n'wina mi ni miri.
Mingafumiweni hi male kuhanyeni ka n'wina kambe tsakani hi lesvi minga na svona, hikuva Xikwembu xite: “Ningakala ningakutshiki, kumbe kukucukumeta, ni siku ni rin'we.”
Yanakanyani vafambisi va n'wina, lavangamijondzisa rito ra Xikwembu; yehleketani vutomi bza vona ni makumu ya bzona, milandza ntila wa kupfumela ka vona.
Mingakanganyisiweni hi tijondzo ta tinxakaxaka letingatwisisekiki. Svilulamile loko mbilu yitiyisiwa hi timpsalu ta Xikwembu, kungali hi milawu hi tlhelo ra svakuja, lesvingapfuniki nchumu ka lava vasvilandzelelaka.
Hikuva ngati ya svifuyu leyitisiwaka ndhawini leyokwetsimisisa hi Muprista lwenkulu kutakhongelela svijoho, anyama ya svona yihiseliwa handle ka vugovelo.
Hi mukhuva wolowo, na yena Yesu atwisiwe kuvaviseka na ali handle ka nyangwa ya doropa, lesvaku atabasisa vanhu vakwetsimisiwa hi ngati ya yena ya xiviri.
Loko svilitano, ahihumeseni timhamba masiku hinkwawu ha yena Yesu, hidzunisa Xikwembu ha tona, na hili karhi hikhensa vito ra xona hi marito lawa mahumaka milon'weni ya hina.
Yingisani varhangeli va n'wina, mititsongahata ka vona, hikuva vahitekela mimoya ya n'wina, kufana ni vanhu lavangatavutisiwa henhla ka yona. Mivona lesvaku valandza ntirho wa vona hi kutsaka, vangawuyendli hi kuvilela, hikuva loko vavilela, asvingamipfuni nchumu n'wina.
Svosvi-ke, Xikwembu xa kurhula lexipfuxeke Hosi ya hina Yesu xikarhi ka vafi, yena lweyi anga Murisi Lwenkulu wa tinyempfu, lweyi angafunga ntwananu lowungaheliki hi ngati ya yena,
ingi xingamilongisa hinkwasvu lesvinene lesvingatamipfuna kuyendla kurhandza ka xona, na xili karhi xitirha ka hina lesvi xisvitsakelaka, ha Yesu Kriste. Ka xona akuve kudzuneka hi masiku ni masiku. Amen!