Saneyap imam agung epele dhari antarana ommat, ban eangkat kaangguy ngabdi ka Allah menangka bakkella ommat ganeka. Lakona enggi paneka ngatorragi ka Allah tor-ator sareng ban-kurban kaangguy panyapora'anna dusa.
Sapaneka jugan Almasih. Salerana ta' ngangkat Salerana dibi' daddi Imam Agung. Allah dibi' se ngangkat Salerana. Allah adhabu ka Salerana, “Ba'na Tang Ana'; e are teya Sengko' daddi Ramana Ba'na.”
E bakto Isa odhi' e dunnya reya, Salerana adu'a ban nyo'on kalaban acerreng ban molar ka Allah, se sanggup masalamet Salerana dhari pate. Ban sarrena Salerana ta'at ka Allah kalaban hormat se tadha' batessa, daddi Salerana epeyarsa'agi.
Parkara kadhudhuganna Isa menangka Imam Agung, bannya' se ekabala'a kaula ka sampeyan, nangeng malarat se nerrangngagiya sabab sampeyan ce' lerena se ngarteya.