इसतांई जाह़लू अहां पैहल्ली बरी मसीह दे बारे सिखया, तां ओआ मसीह दी सिक्षा ते गांह बधी करी सिद्धता च तरक्की करन। अहां अपणे बुरे कम्मां ते मन बदली लैन जेह्ड़े मौत्ती पास्से लेई जांदे हन, कने परमात्मे पर बसुआस करणे दी दुवारी गल्ल नीं करणी चाइदी।
जे सैह़ परमात्मे ते दूर होई गै हन, तां तिन्हां जो बापस अणने दा कोई तरीका नीं ऐ। क्जोकि सैह़ परमात्मे दे पुत्तरे जो दुवारी सूल़िया पर चढ़ांदे हन, कने दूयेयां सामणै तिसदा मजाक बणांदे हन।
दूये लोक तिसा जमीना साइआं हन, जेह्ड़ी कंडे आल़िआं झाड़ियां पैदा करदी ऐ, जिन्हां दी कोई कीमत नीं ऐ, परमात्मा इसा जमीना जो श्रापित करगा, कने इसा च पैदा होणे आल़िआं बेकार चीज्जां जो अग्गी च फुकी दिंगा।
क्जोकि परमात्मा गलत फैसला नीं करदा ऐ, कि तुहां दे कम्मां कने तिस प्यारे जो भुल्ली जां, जेह्ड़ा तुहां तिसदे नांऐ तांई इस तरीके नैं दस्सेया, कि तिसदे लोकां दी सेवा कित्ती कने करा दे भी हन।
आलसी मत बणा। अपर मेहनत करणे आल़ेआं साइआं बणा, तुहां एह़ प्यारे दे कम्म सबर कने बसुआसे सौगी लगातार अन्त तिकर करदे रेह्आ, कने परमात्मे दे वादेयां जो पाणे तांई पक्की आसा रखा।
इसतांई परमात्मैं भी कसम खादी। इआं करणे ते सैह़ लोकां जो जिन्हां सौगी वादा कित्या था, तिन्हां जो दस्सणा चांह़दा था, जेह्ड़ा वादा तिन्हीं तिन्हां नैं कित्या था, तिसियो पूरा करगा।