|
| 1 |
|
| Thâu chi̍t ê iok mā ū lé-pài ê kui-tēng kap tōe-chiūⁿ ê sèng-só͘. |
|
| 2 |
|
| Ū chi̍t ê tah hó-sè ê tiùⁿ-bō͘, thâu-chêng-keng kiò-chòe Sèng-só͘, lāi-bīn ū teng-tâi, toh, kap hiàn-chè ê piáⁿ. |
|
| 3 |
|
| Tē-jī ê tiùⁿ-lî ê āu-bīn-keng kiò-chòe Chì-sèng-só͘, |
|
| 4 |
|
| lāi-bīn ū kim-hiuⁿ-tôaⁿ kap choân-pō͘ ēng kim pau ê iok-kūi, kūi-lāi ū tóe má-ná ê kim-ô͘, A-lûn hit-ki puh-gê ê koáiⁿ-á, kap nn̄g tè iok ê chio̍h-pán. |
|
| 5 |
|
| Kūi-téng ū êng-kng ê thiⁿ-sài ki-lō͘-pek, in ê si̍t jia-khàm si-un-chō. Koan-hē chiah-ê sū, hiān-chāi góa bōe-tàng siông-sè soat-bêng. |
|
| 6 |
|
| Chiah-ê mi̍h-kiāⁿ chiàu án-ni an-pâi hó-sè, chè-si chiū ta̍k-ji̍t ji̍p-khì tiùⁿ-bō͘ ê thâu-chêng-keng kú-hêng lé-pài gî-sek. |
|
| 7 |
|
| Āu-bīn-keng chí-ū tōa-chè-si chiah thang ji̍p--khì, m̄-kú ta̍k-nî chí-ū chi̍t piàn, ta̍k-piàn tio̍h tòa huih ji̍p--khì, ūi-tio̍h pún-sin í-ki̍p bîn-chiòng bô-ì-tiong hoān ê chōe lâi hiàn. |
|
| 8 |
|
| Tùi chiah-ê an-pâi Sèng Sîn ū bêng-bêng piáu-sī, tiùⁿ-bō͘ ê thâu-chêng-keng iáu chûn-chāi, chìn-ji̍p Chì-sèng-só͘ ê lō͘ chiū iáu-bē khui. |
|
| 9 |
|
| Tiùⁿ-bō͘ ê thâu-chêng-keng phì-jū hiān-sè, sī kóng, só͘ hiàn ê lé-mi̍h kap chè-phín bōe-tàng hō͘ lé-pài ê lâng ê liông-sim chheng-pe̍k. |
|
| 10 |
|
| Chiah-ê kan-ta sī koan-hē lim-chia̍h kap ta̍k-khoán ê kiat-chēng-lé, sī sio̍k gōa-piáu ê kui-lē, chí-ū sek-iōng kàu Siōng-tè keng-sin bān-mi̍h ê sî. |
|
| 11 |
|
| M̄-kú Ki-tok í-keng lâi, choh Tōa-chè-si, ū si̍t-hiān hó-sū. I ū keng-kè khah-tōa, khah oân-choân, m̄-sī lâng ê chhiú só͘ tah, m̄-sī sio̍k chit sè-kan ê tiùⁿ-bō͘. |
|
| 12 |
|
| I chí-ū chi̍t piàn chìn-ji̍p Chì-sèng-só͘, m̄-sī ēng soaⁿ-iûⁿ ê huih kap gû-á ê huih, sī ēng ka-kī ê huih ūi-tio̍h lán sêng-choân éng-oán ê kiù-sio̍k. |
|
| 13 |
|
| Soaⁿ-iûⁿ kap gû-káng ê huih, í-ki̍p gû-bú-á ê kut-hu nā hiù tī bô chheng-khì ê lâng to ōe hō͘ in sèng-hòa chheng-khì, |
|
| 14 |
|
| hô-hòng Ki-tok thong-kè éng-oán ê Sîn hiàn I bô hâ-chhû ê pún-sin hō͘ Siōng-tè, I ê huih kiám bōe hō͘ lán ê liông-sim koh-khah chheng-khì, thoat-lī sí ê hêng-ûi, lâi ho̍k-sāi éng-oa̍h ê Siōng-tè? |
|
| 15 |
|
| In-ūi án-ni, Ki-tok chòe sin ê iok ê tiong-kan-jîn, sī beh hō͘ Siōng-tè ho͘-tiàu ê lâng ōe-tit niá-siū I só͘ èng-ún éng-oán ê sán-gia̍p, in-ūi Ki-tok í-keng ēng I ê sí sio̍k-hôe in tī chêng ê iok ê sî só͘ hoān ê chōe-kò. |
|
| 16 |
|
| Koan-hē ûi-chiok, it-tēng tio̍h seng chèng-si̍t li̍p ûi-chiok ê lâng í-keng sí. |
|
| 17 |
|
| In-ūi ûi-chiok it-tēng tio̍h li̍p ûi-chiok ê lâng sí chiah ū-hāu. Li̍p ûi-chiok ê lâng iáu oa̍h--teh, ûi-chiok chiū bô-hāu. |
|
| 18 |
|
| Án-ni, liân thâu chi̍t ê iok mā-sī ū ēng huih lâi sêng-li̍p. |
|
| 19 |
|
| Mô͘-se chiàu Lu̍t-hoat chiong it-chhè ê kài-bēng tùi jîn-bîn soan-pò͘, jiân-āu phâng gû-káng kap soaⁿ-iûⁿ ê huih chham chúi, ēng chu-âng-sek ê iûⁿ-mn̂g kap gû-chhek-chháu hiù tī hit-pún chheh ê téng-bīn kap choân-thé jîn-bîn ê sin-chiūⁿ, |
|
| 20 |
|
| kóng, “Che sī Siōng-tè kap lín li̍p-iok ê huih.” |
|
| 21 |
|
| Siâng-khoán, Mô͘-se mā chiong huih hiù tī tiùⁿ-bō͘ kap lé-pài ê sî só͘ ēng it-chhè ê khì-khū. |
|
| 22 |
|
| Chiàu Lu̍t-hoat, chha-put-to só͘-ū ê mi̍h lóng ēng huih kiat-chēng; bô lâu-huih chiū bô sià-chōe. |
|
| 23 |
|
| Chiàu thiⁿ-téng ê khoán-sit só͘ hóng-chō ê mi̍h su-iàu ēng cheng-siⁿ ê huih lâi kiat-chēng; m̄-kú thiⁿ-téng ê goân-mi̍h su-iàu ēng pí chiah-ê khah hó ê chè-mi̍h lâi kiat-chēng. |
|
| 24 |
|
| Ki-tok ji̍p--khì-ê pèng m̄-sī lâng ê chhiú chō ê Sèng-só͘, che put-kò sī chin Sèng-só͘ ê hù-pún; I sī ji̍p-khì thiⁿ-téng ê chin Sèng-só͘. I hiān-chāi ūi-tio̍h lán chhut-hiān tī Siōng-tè ê bīn-chêng. |
|
| 25 |
|
| Ki-tok m̄-bián chi̍t-piàn koh chi̍t-piàn hiàn pún-sin, chhin-chhiūⁿ tōa-chè-si tio̍h ta̍k-nî kè-sio̍k tòa cheng-siⁿ ê huih ji̍p-khì Chì-sèng-só͘. |
|
| 26 |
|
| Nā tio̍h chi̍t-piàn koh chi̍t-piàn hiàn, tùi chhòng-chō sè-kài í-lâi, Ki-tok tio̍h chi̍t-piàn koh chi̍t-piàn siū-khó͘. M̄-kú hiān-chāi tī chit-ê sè-tāi ê lō͘-bé, I chí-ū chhut-hiān chi̍t piàn, chiong pún-sin hiàn chòe chè lâi tû-khì chōe. |
|
| 27 |
|
| Chiàu só͘ chù-tiāⁿ, lâng tio̍h chi̍t piàn sí, sí-āu tio̍h siū Siōng-tè sím-phòaⁿ. |
|
| 28 |
|
| Chhin-chhiūⁿ án-ni, Ki-tok í-keng ū chi̍t piàn hi-seng lâi tam-tng chèng-lâng ê chōe; I ōe tē-jī piàn hián-hiān, m̄-sī beh tùi-hù chōe, sī beh chín-kiù pek-chhiat teh thèng-hāu I lâi ê lâng. |
|
|
|
|