Mina Yakobe, nandza wa Xikwembu ni wa Hosi Yesu Kriste, nitsalela khume ra tinxaka ni timbirhi, vanga vakriste lavahangalakeke matikweni hinkwawu, nili: Xeweni!
Jambu rihuma na rili ni kuhisa ka rona, rivunisa bzanyi; sviluva sviwela hansi, ni kusaseka ka svona kawonheka. Hi mukhuva wolowo, mufuwi na yena atavuna ahelisiwa, na ali karhi alandzelela svilo sva yena.
Kungavi ni munhu lweyi, loko aringiwa, ango: “Niringiwa hi Xikwembu.” hikuva Xikwembu xingakala xingaringiwi hi lesvobiha; na svona, xona hi xoxe, axiringi munhu ni mun'we.
Nyiko yin'wana ni yin'wana leyosaseka ni minkateko hinkwayu leyihetisekeke svita hi le henhla, svixika hi le ka Muvumbi wa lesvivoningaka, lweyi kungahava kucincacinca ka yena, kumbe kufularhela munhu asala xinyameni.
Kambe lweyi akambisisaka Nawu lowuhetisekeke wa kutshunxeka, atiyisela ka wona na angali mutwi lweyi arivalaka, kambe ali muyendli lweyi atirhaka, atakateka ka lesvi asviyendlaka.
Vukhongeli lebzitengeke, lebzingasolekiki mahlweni ka Xikwembu Tatana, hi lebzi: Kuyendzela lavafeliweke hi vapsele, ni kuyendzela vafelakazi maxangwini ya vona, ni kutikhoma ka vuherheki bza misava leyi.