|
| 1 |
|
| ನಿಕ್ಲೆ ಉಲಯಿ ಲಡಾಯಿಲಾ ಉರ್ಡಾಟಲಾ ದಾಯೆಗ್ ಆಪುಂಡು? ಅವು ನಿಕ್ಲೆನ ಹಾಳ್ ದುರಾಶೆಲೆಡ್ದ್ ಬರ್ಪಿನವು ಅತ್ತಾ? |
|
| 2 |
|
| ನಿಕುಲು ಬಯಕುವರ್, ಆಂಡ ತಿಕ್ಕುಜಿ. ಕೆರಿಯೆರೆ ತಯಾರಾಪರ್, ಮಚ್ಚರ ಮಲ್ಪುವರ್, ನಿಕ್ಲೆಗ್ ಅವು ತಿಕ್ಕಂದೆ ಪೋನಗ ಅವು ತಿಕ್ಕೆರೆ ಬೋಡಾದ್ ನಿಕುಲು ಉರ್ಡಾಟಲಾ ಲಡಾಯಿಲಾ ಮಲ್ಪುವರ್. ನಿಕುಲು ದೇವೆರೆಡ ನಟ್ಟೊನಂದೆ ಇತ್ತಿನೆಡ್ದ್ ನಿಕ್ಲೆಗ್ ದಾಲಾ ತಿಕ್ಕುಜಿ. |
|
| 3 |
|
| ನಿಕುಲು ನಟ್ಟೊನ್ನಗ ನಿಕ್ಲೆನ ಆಲೋಚನೆ ಪಡಿಕೆಂತಿನವು ಆದಿತ್ತಿನೆಡ್ದ್ ನಿಕ್ಲೆಗ್ ತಿಕ್ಕುಜಿ. ನಿಕುಲು ನಿಕ್ಲೆನ ಸ್ವಂತ ಶರೀರದ ಆಸೆಗಾದ್ ಮಾತ್ರ ನಟ್ಟೊನುವರ್. |
|
| 4 |
|
| ಹಾದ್ರದ ಬುದ್ಧಿದಾಕುಲೇ, ಲೋಕದ ಪಡಿಕೆಂತಿ ಪ್ರೀತಿಡ್ ಉಪ್ಪುನವು ದೇವೆರೆಗ್ ವಿರೋಧದವು ಆದುಂಡು ಇನ್ಪಿನೆನ್ ನಿಕುಲು ತೆರಿದಿಜರಾ? ಅಂಚಾಂಡ ಲೋಕದ ಪಡಿಕೆಂತಿ ಪ್ರೀತಿಡ್ ಈ ಉಪ್ಪುವಡ, ಈ ನಿನ ದೇವೆರೆಗ್ ಪಗೆನಾಯೆ ಆದುಪ್ಪುವ. |
|
| 5 |
|
| “ನಮ ಉಲಯಿಡ್ ದೇವೆರ್ ದೀತಿನ ಆತ್ಮ, ದೇವೆರೆಡೊಪ್ಪನೇ ಉಪ್ಪೊಡು ಅಂದ್ದ್ ದೇವೆರ್ ಬಯಕುವೆ,” ಇನ್ಪಿನ ಶಾಸ್ತ್ರದ ಪಾತೆರ ಅರ್ಥದಾಂತಿನವು ಅಂದ್ದ್ ಎನ್ನುವರಾ? |
|
| 6 |
|
| ಆಂಡ ಆಯೆ ದಿಂಜ ದಯ ಕೊರ್ಪೆ. ಶಾಸ್ತ್ರೊಡು ಪನ್ಪಿಲೆಕ್ಕನೇ, “ದೇವೆರ್ ಅಹಂಕಾರಿಲೆಗ್ ಎದುರುಂತುವೆ, ಆಂಡ ತಗ್ಗ್ದಿನಾಕುಲೆಗ್ ದಯ ಕೊರ್ಪೆ.” |
|
| 7 |
|
| ಅಂಚಾಯಿನೆಡ್ದ್ ದೇವೆರೆ ಎದುರುಡು ನಿಕ್ಲೆನ್ ತಗ್ಗಾವೊನ್ಲೆ. ಸೈತಾನಗ್ ಎದುರುಂತುಲೆ, ಅಪಗ ಸೈತಾನೆ ತಾನೆ ನಿಕ್ಲೆನ್ ಬುಡ್ದು ದೂರ ಬಲ್ಪುವೆ. |
|
| 8 |
|
| ದೇವೆರ್ ಕೈತಲ್ ಬರ್ಪೆ, ಪಾಪಿಲೇ, ನಿಕ್ಲೆ ಕೈನ್ ದೆಕ್ಕೊನ್ಲೆ. ರಡ್ಡ್ ಮನಸ್ದಾಕುಲೇ ನಿಕ್ಲೆ ಉಡಲ್ನ್ ಶುದ್ಧ ಮಲ್ತೊನ್ಲೆ. |
|
| 9 |
|
| ನಿಕುಲು ಮಲ್ತಿನೆಕ್ಕಾದ್ ಮುರೆಡ್ಲೆ, ದುಃಖ ಮಲ್ಪುಲೆ, ಬುಲ್ಪುಲೆ. ನಿಕ್ಲೆನ ತೆಲಿಕೆ ದುಃಖ ಆದ್ ಪೋವಡ್, ನಿಕ್ಲೆ ಸಂತೋಷ ಬೇಜಾರ್ಡ್ ಪೋವಡ್. |
|
| 10 |
|
| ಕರ್ತವ ಎದುರುಡು ನಿಕ್ಲೆನ್ ತಗ್ಗಾವೊನ್ಲೆ. ಅಪಗ ಆಯೆ ನಿಕ್ಲೆನ್ ಮಿತ್ತ್ ಕನಪೆ. |
|
| 11 |
|
| ಸಹೋದ್ರೆರೇ, ಒರಿಯಗ್ ಒರಿ ನಿಂದೆ ಮಲ್ಪಡೆ. ಏರಾಂಡಲಾ ತನ ಸಹೋದ್ರಗ್ ನಿಂದೆ ಮಲ್ತ್ದ್ ತನ ಸಹೋದ್ರನ ಸಂಗತಿಡ್ ತೀರ್ಪು ಮಲ್ತ್ಂಡ, ಆಯೆ ನ್ಯಾಯಕಟ್ಟ್ಗ್ ನಿಂದೆ ಮಲ್ತ್ದ್ ತೀರ್ಪು ಮಲ್ತಿಲೆಕ್ಕ ಆವು. ಆಂಡ ಈ ನ್ಯಾಯಕಟ್ಟ್ಡ್ ಬರೆತಿನೆನ್ ತೀರ್ಪು ಮಲ್ಪುವಡ, ಈ ನ್ಯಾಯತೀರ್ಪುನಾಯೆ ಅಂದ್ದ್ ಎನ್ನುವ ಅತ್ತಂದೆ ನ್ಯಾಯಕಟ್ಟ್ನ್ ಕೈಕೊನುನಾಯೆ ಆದುಪ್ಪುಜ, |
|
| 12 |
|
| ನ್ಯಾಯಕಟ್ಟ್ ಕೊರ್ತಿನಾಯೆಲಾ ನ್ಯಾಯಾಧಿಪತಿಲಾ ಒರಿಯೇ; ರಕ್ಷಣೆ ಮಲ್ಪುನಾಯೆಲಾ ನಾಶ ಮಲ್ಪುನಾಯೆಲಾ ಆಯೆನೇ. ಆಂಡ ನಿನ ನಿರೆತ್ತಾಯನ ಸಂಗತಿಡ್ ತೀರ್ಪು ಮಲ್ಪುನಾಯೆ ಈ ಏರ್? |
|
| 13 |
|
| “ಇನಿ ಇಜ್ಜಿಡ ಎಲ್ಲೆ ಇಂಚಿತ್ತಿ ಊರುಗು ಪೋದು ಅಲ್ಪ ಒಂಜಿ ವರ್ಸ ಉಂತುಗ, ಅಲ್ಪ ವ್ಯಾಪಾರ ಮಲ್ತ್ದ್ ಲಾಭ ಮಲ್ಪುಗ,” ಅಂದ್ದ್ ಪನ್ಪಿನಾಕುಲೇ ಇಂಚಿ ಕೇನ್ಲೆ, |
|
| 14 |
|
| ಎಲ್ಲೆ ನಿಕ್ಲೆ ಜೀವನ ದಾದ ಆಪುಂಡು ಅಂದ್ದ್ ನಿಕ್ಲೆಗ್ ತೆರಿದ್ಂಡಾ? ನಿಕ್ಲೆ ಜೀವನ ಕಾಂಡೆದ ಮೈಂದ್ದ ಲೆಕ್ಕನೇ ಉಂಡು; ಅವು ಇತ್ತೆ ಒಂತೆ ಪೊರ್ತು ಉಪ್ಪುಂಡು, ಬೊಕ್ಕ ತೋಜಂದೆ ಪೋಪುಂಡು. |
|
| 15 |
|
| ಐಕಾದ್ ನಿಕುಲು ಅಂಚಿತ್ತಿ ಪಾತೆರ ಬುಡ್ದು, ಕರ್ತವ ಚಿತ್ತ ಇತ್ತ್ಂಡ, ಎಂಕುಲು ಬದ್ಕ್ದ್ ಈ ಬೇಲೆ ಅತ್ತ್ಡ ಆ ಬೇಲೆನ್ ಮಲ್ಪುವ ಅಂದ್ದ್ ಪನೊಡು. |
|
| 16 |
|
| ಇಂಚ ನಿಕುಲು ಪನಂದೆ ಬೂಟುಡು ಪುಗರೊನ್ವರ್, ಇಂಚಿತ್ತಿ ಪುಗರಿಗೆ ಮಾತಲಾ ಹಾಳ್ ಆದುಂಡು. |
|
| 17 |
|
| ಅಂಚಾಯಿನೆಡ್ದ್ ಎಡ್ಡೆಂತಿನೆನ್ ಮಲ್ಪೆರೆ ತೆರಿದಿತ್ತ್ಂಡಲಾ ಅವೆನ್ ಮಲ್ಪಂದೆ ಉಪ್ಪುನವು ಪಾಪನೇ. |
|
|
|
|