“N dabili Musa kpiya, dinzuɣu a mini niriba ŋɔ zaa yiɣisim’ pumpɔŋɔ n-chaŋ ti gbaai Jɔɔdɛn Mɔɣili ŋɔ du n-kuli n ni zaŋ tiŋgbɔn shɛli ti yinim’ Izraɛlnim’ ŋɔ ni.
Yi tintarisi ti yɛn nyɛla nudirigu polo tiŋgban’ nɛli tiŋgbɔŋ la zaŋ hal ti paai Lɛbanɔn nuzaa polo zoya la shee mini Yufretiiz Mɔɣ’ titali din be wulimpuhili polo la noli zaŋ tabili Hitinim’ tiŋgbɔŋ la zaa m-mali hal ti paai wulinluhili polo Mɛditirɛniɛn Teeku tital’ la noli.
Ka so ku tooi zaŋ o nyɔɣu yo a hal ni a nyɛvili tariga. N ni be a sani kaman n ni daa be Musa sani shɛm la. N ku chɛ ka a ti bɔri ma ka bi nya ma, m mi ku chɛ a.
Naɣ’ kul malila yaa mini suhukpeeni pam; ka doli zaligu shɛŋa zaa n dabili Musa ni daa zali ya la viɛnyɛliŋga; ka miri ka a ŋmaligi kpa nudirigu polo bee nuzaa polo ka chɛ li, ka di chɛ ka a tooi diri nasara luɣ’ shɛlikam a ni yɛn chaŋ.
Chɛ ka zaligu litaafi ŋɔ yɛtɔɣa kul be a nol’ ni sahakam, kul bɔhimmi li wuntaŋ’ ni ni yuŋ din ni chɛ ka a tooi doli din sab’ di ni maa viɛnyɛliŋga; ka di chɛ ka a tɔŋ a sol’ ni, ka lan chɛ ka a di nasara viɛnyɛliŋga.
Mani n-zal’ a ni a kul mali yaa mini suhukpeeni pam. Di zɔri dabiɛm bee n-chɛ ka a suhu zɔhira, dama man’ Yawɛ ŋun nyɛ a Naawuni ŋɔ kul be a sani luɣ’ shɛlikam a ni chana.”
“Yiɣisimiya chaŋ gili yɛli niriba maa ni bɛ bom’ bindira m-mali shili gu, dama ni di kpalim daba ata ni bɛ gbaai Jɔɔdɛn Mɔɣili ŋɔ du n-kuli ti ʒini tiŋgbɔn shɛli Yawɛ ŋun nyɛ yi Naawuni ŋɔ ni daa zaŋ tin ya la ni.”
Dinzuɣu yi paɣiba mini yi bihi ni yi biŋkɔbiri ni kpalim be tiŋgbɔn shɛl’ ni Musa ni daa zaŋ tin ya Jɔɔdɛn Mɔɣili yaɣili ŋɔ na. Amaa ka yi ni tɔbbihi bɛn lo kpara zaa pahi yi mabihi maa zuɣu n-chaŋ ti sɔŋ ba
hal ka Yawɛ ti chɛ ka bɛ gba deei ŋun’ Yawɛ ŋun nyɛ yi Naawuni ŋɔ ni zaŋ tiŋgbɔn shɛli ti ba maa, ka yi naanyi labi Yawɛ dabili Musa ni daa zaŋ tiŋgbɔn shɛli din be Jɔɔdɛn Mɔɣili duli wulimpuhili polo ŋɔ n-tin ya ŋɔ ni na ti ʒini.”
Ti ni daa deei Musa noli shɛlikam ni shɛm, lala ka ti yɛn deeg’ a noli, amaa ti lee suhirimi ni Yawɛ ŋun nyɛ a Naawuni ŋɔ be a sani kaman o ni daa be Musa sani shɛm la!