Zerizalɛɛm dĩm, a Adoni-Sedɛk, wa n wʋmame t'a Zozuwe wẽe Ayi n tõog-a, n dɩk-a zãnga n kõ Soaala-Wẽnde la a maana ne a dĩma wala a sẽn maan ne Zeriko soaba. A wʋmame yɛsa tɩ Gabaõ rãmb yõga zood ne a Israyɛl n tɩ kẽe n naag-a.
Amoritsa dĩm dãmb a nu wã sɩd sega taaba n na n sõng taab n zabe. Yɩɩ Zerizalɛɛm ne Ebrõ, Yarmut, Lakis la Eglõ dĩm bãmb ne b tãb-biisi. Bãmb n gũbg Gabaõ n na n tak zabre.
Gabaõ rãmb me tʋmame tɩ b tɩ yeel a Zozuwe, dẽ t'a ket Gilgal: «Da bas f yemsa ye, wa tao-tao n sõng-do n fãag-do tɩ Amoritsa tãmsa zug dĩm dãmba yik n sũu taaba n na n tak zabre ne do.»
Soaala-Wẽnd meng n kɩt tɩ bɛɛba ning tĩiga b sẽn yãee a Israyɛl. A Israyɛl tõog-b-la sõmbo, n dig-b Gabaõ n tees Bɛt-Orõ la yii vargre, Azeka n ta Makeda.
A Israyɛl sẽn wa n tõog bɛɛba tɩ b zoet n sigd Bɛt-Orõ, Soaala-Wẽnd yãag-b-la ne sapɩlem kuga n ta Azeka la kuga pãb-b lame n kʋ. Sapɩlma sẽn kʋ neba yɩɩga Israyɛl kamba sẽn kʋ ne b sʋʋse.
La wĩndig yaasame la kiuug pa luk a zĩigẽ ye al t'a Israyɛl wa rok a sũur ne a bɛɛba. La ka rẽ n da pĩnd n gʋls Wẽnd nin-sõng sebra pʋgẽ bɩ? Wĩndig yalsa zug tẽnsʋka, n pa raara a ye tõre n pa lʋɩ ye.
B wa ne ba t'a Zozuwe yaool n bool Israyɛl tõre la a yeel tãnsoaben-damba sẽn yãag-b yẽ wã: «Kolg-y la ned kam fãa teeg dĩm dãmba yubl ne a naoore.» B maama boto.
Zĩig sẽn wa n sobgdẽ a Zozuwe kõo noore tɩ b sik-ba n lob tãnga bokẽ, b sẽn da solg b mens zĩig ningã. B wʋka kug bɛd n zam boka noore la b keta ne rũnna.
Baraare a Zozuwe wẽe Makeda n tõog-a la a kɩtame tɩ b kood a neba la a dĩma. Bõn-vɩɩl fãa soogr da lebga kisgu. Ba a ye ka põs ye. Sẽn maan ne Zeriko dĩma n maan ne Makeda Naaba.
Naaba-Wẽnd dɩka Libna ne a dĩma n sagl a Israyɛl nugẽ la a Israyɛl kooda bõn-vɩɩl fãa. Ba a ye ka põs ye. Sẽn maan ne Zeriko dĩma n maan ne Libna rẽnda.
A dĩma ne a soolem dãmba fãa, a kood-b lame. Bõn-vɩɩl fãa soogr da lebga kisgu la woto, ba a ye ka põs ye. A Zozuwe sẽn maan bũmb ning ne Ebrõ, bõn-kãng la a maan ne Debir la bõn-kãng me la a reng n maan ne Libna la a dĩma.
A Zozuwe sẽn tõog tẽns niynsa yɩɩ woto: tãng zug rãmba, Negɛb rãmba, bãadẽ dãmba, kunkubẽ dãmba: Dĩm bi talga, ned ba a ye ka pa vɩɩg ye. Bõn-vɩɩl fãa soogr da lebga kisgu, wala Israyɛl Wẽnnaama sẽn da kõ-a noore.