Ya na ya re ge Adoni-Tsedeke kgoši ya Jerusalema a ekwa gobane Joshua o hutše motse wa Ai a o dira segafiwamoka, le gobane o dirile motse wa Ai le kgoši ya gona se a se dirilego Jeriko le kgoši ya gona, le gobane Bagibeoni ba dirile leago le Baisiraele baagišana le bona.
A boifa gagolo; ka gobane Gibeoni e be e le motse o mogolo bjalo ka motse wa mošate, o fetiša Ai ka bogolo; mme banna ba gona ka moka e be e le bagale.
Ke mo Adoni-Tsedeke kgoši ya Jerusalema a romilego batseta ba ya go Hohama kgoši ya Heburone, le go Pireama kgoši ya Jaramuthe, le go Jafia kgoši ya Lakisi, le go Debiri kgoši ya Egilone, a re:
Gwa bokana dikgoši tše tlhano tšeo tša Baamoro, e le kgoši ya Jerusalema, le ya Heburone, le ya Jaramuthe, le ya Lakisi, le ya Egilone; tša rotoga le madira a tšona ka moka, tša rakella motse wa Gibeoni tša lwa le wona.
Banna ba Gibeoni ba iša lentšu go Joshua kua mešašeng ya Giligala, ba re: Se re tšholle ba re lego bahlanka ba gago. Napa o rotogele mono o re namolele, o re lwele, ka gobane re šwahletšwe ke dikgoši ka moka tša Baamoro tše di agilego mono dithabeng.
Morena a ba raranya ge go fihla Baisiraele, ba ba bolaya o šoro gona moo Gibeoni; ba ba rakediša tseleng ya go rotogela Bethe-Horoni, ba ba rothotha go fihla Aseka le Makeda.
Ge ba fela ba tšhaba morotogeng wa Bethe-Horoni, Morena a ba betša ka sefako se segolo sa magodimong go fihla Aseka, sa ba bolaya; ya ba ba ba hwilego ka sefako ba fetiša ba ba bolailwego ke Baisiraele ka marumo.
Mohlang woo ge Morena a gafile Baamoro ge Baisiraele ba fihla, Joshua a kgopela Morena a re: Wena letšatši, šišimala mo Gibeoni, wena kgwedi, mogorogorong wa Ajaloni!
Letšatši la na la šišimala, le kgwedi ya ema, setšhaba sa ba sa fetša manaba a sona -- A ga ke re di ngwadilwe mo pukung ya baloki? -- Letšatši la ema mo gare ga leratadima, la diega go dikela ya ba e ke ke letšatši le le tletšego.
Letšatši le le etšago leo le be le sešo la ba gona kgaleng, gomme ga la ka la buša la ba gona, leo Morena a kilego a kwa lentšu la motho ka mokgwa o bjalo, ka gobane Morena a be a hlabanela Isiraele.
Ge e le lena le se ke la ema; le fele le hlomarele manaba a lena, le bolaye sekgoto sa ona; le se ke la ba lesa ba tsena metseng ya bona; gobane Morena Modimo wa lena o ba gafetše diatleng tša lena.
Ya re ge Joshua le Baisiraele ba feditše go ba bolaya ka polao e kgolokgolo yeo, gomme ba bile ba fedišitšwe, metseng ya bona ya dibo go fihlile baphonyokgi ba bona,
Gwa dirwa bjalo; ba tliša dikgoši tše tlhano tšeo, ba di ntšhitše mphomeng, e le kgoši ya Jerusalema, le kgoši ya Heburone, le ya Jaramuthe, le ya Lakisi, le ya Egilone.
Ya re ge di tlišitšwe go Joshua, a botha banna ka moka ba Isiraele, a botša balaodi ba bahlabani ba ba bego ba tšwile le yena a re: Batamelang le gate melala ya dikgoši tše! Ba batamela ba ba gata melala.
Joshua a re: Le se ke la boifa. Le se ke la tšhoga. Tiisan maatla le dire senna; ka gobane manaba a lena ka moka a a tlogo lwa le lena, Morena o tlo a dira ka mokgwa wo.
Ge le dikela Joshua a laela gore ba fegollwe; mme ba ba lahlela mphomeng wola, wo ba bego ba iphihlile go wona; ba kgatlela molomo wa mphoma ka maswika a magolo; ona le mehleng yeno a sa le gona.
Mohlang woo Joshua a thopa motse wa Makeda, a o fenya ka bogale bja marumo; kgoši ya gona le batho ba yona a ba dira segafiwamoka, a se šadiše le o tee. Kgoši ya Makeda o e dirile se a se dirilego kgoši ya Jeriko.
Le wona Morena a o gafela diatleng tša Baisiraele, le kgoši ya gona. Joshua a ba bolaya ka bogale bja marumo, batho bohle ba ba bego ba le motseng woo. Ba se ke ba šadiša le o tee; kgoši ya gona a e dira se a se dirilego kgoši ya Jeriko.
Le motse wa Lakisi Morena o o gafela diatleng tša Baisiraele, ba o thopa ka letšatši la bobedi, ba o fetša ka bogale bja lerumo le bohle ba ba bego ba le mo go wona; ba dira tše ba di dirilego Libina.
Ba o thopa ka lona letšatši leo, ba o fetša ka bogale bja marumo le bohle ba ba bego ba le mo go wona. A ba dira segafiwamoka ka lona letšatši leo; a o dira se a se dirilego motse wa Lakisi.
Ba o thopa ba o fetša ka bogale bja marumo, le kgoši ya gona, le metsana ya gona ka moka; ba se ke ba šadiša motho. A o dira tše a di dirilego motse wa Egilone, a o dira segafiwa le bohle ba ba bego ba le mo go wona.
Ba o thopa, le kgoši ya gona le bohle ba ba bego ba le go wona; ba ba fetša ka bogale bja marumo. Gomme bohle ba ba bego ba le mo go wona ba ba dira segafiwamoka, ba se šadiše motho. Motse wa Debiri ba o dira tše ba di dirilego Heburone le Libina le kgoši ya gona.
Ya ba wona mokgwa wo Joshua a fentšego naga ka moka ka wona, naga ya dithabeng le ya thoko ya Borwa, le ya magoleng le dipatogeng tša dithaba, le dikgoši tša gona, a se ke a šadiša motho, bohle a ba dira digafiwamoka, ka mo Morena Modimo wa Isiraele a bego a laetše ka gona.