A le tʋma dĩm dãmb a taab nengẽ: dĩm niyns sẽn be nug goabga, tãnga zug, Zenezarɛt rɩtgo, dĩm niyns sẽn be bãg-faagẽ la Dor tãn-sɩlemsa zut, nin-taoore.
Soaala-Wẽnd yeela a Zozuwe: «Da zoe nin-bãmba ye, tɩ beoog wakat kãnga, tɩ m dɩk-b-la kɩɩms zãnga n sagl a Israyɛl nugẽ. Fo na n pasa b wiidi wã nao gĩin la f yõog b bilim-bilm.»
Soaala-Wẽnd sagl-b-la a Israyɛl nugẽ t'a tõog-ba n dig kẽer n ta Sidõ Na-tẽnga la Misrefot-Mayim, la Mispa bãg-fool sẽn be yaanga. Pãbra yɩɩ pãbr menga al tɩ nin-yend meng ka paam n zoe n põs ye.
Israyɛl kamba sẽn da wẽen tɩ b kõn kees bũmb b mens yĩngã, b kʋʋ bõn-vɩɩg fãa sẽn da be tẽn-kãng pʋgẽ. Bõn-vɩɩg ka põs ye, la b waa n baas n ninga tẽnga bugum.
A Zozuwe tõoga dĩm dãmba fãa ne b tẽnsã. A kood-b-la gilli, tɩ b ra wẽename tɩ b kõn kees bũmb b mens yĩng ye, wala Soaala-Wẽnd sẽn da wilg b tʋʋm-tʋmd a Moyiiz.
Soaala-Wẽnd sẽn da wilg b tʋʋm-tʋmd a Moyiiz bũmb ningã, a Moyiiz me ra taas-a-la a Zozuwe; la rẽ me la a Zozuwe tũ yã. A ka tol n bas noor a yembr meng a sẽn deeg a Moyiiz nengẽ n ka tũ-a zãng ye.
Sẽn sɩng Alak tãnga sẽn tõnd Seyir sẽnẽ n ta Baal-Gad, Libã bãg-faagẽ, Ermo tãng sɛɛgẽ, tẽn-bãmb fãa lʋɩ-la a Zozuwe nugẽ. A yõga dĩm dãmbã n pãb n kʋ.
Soaala-Wẽnd sɩd da tʋlgame tɩ b kɩʋʋlem b sũuri n tak zabr ne a Israyɛl, t'a Israyɛl me wẽen t'a kõn zoe b nimbãanega n sɩd sɛɛs-b zãnga, wala Soaala-Wẽnd sẽn da kõ a Moyiiz noore.
A Zozuwe sẽn ta bala la a sẽn kʋ Anakitsã. A kʋʋ tãnga zug rãmba, Ebrõ rãmba, Debir la Anab rãmba, sẽn zao-b Zɩɩda bɩ Israyɛl tãmsã. Bãmb ne b tẽnsa lebga kisgu.
Tẽnga fãa lʋɩ-la a Zozuwe nugẽ, wala Soaala-Wẽnd sẽn da wilg a Moyiiz. A weel-a lame n pʋɩ Israyɛl, roog fãa ne a rẽnna. Wakat kãng la tẽnga yaa n paam laafi.