Rîrîa Jabini mûnene wa Hazori aigîîrue nteto cia kûûmbana gwa Israeli, nî aatûmanîre kîrî Jobabu mûnene wa Madoni na mûnene wa Shimuroni na mûnene wa Akishafu.
MWATHANI arabanenkanîra njareene cia Israeli. Aisraeli bareengana nabo bakîbooragaga mwanka Sidoni îrîa nene na Misirefothi-maimu na bwa gaiti mwanka mûuro jwa Mizipe. Barabathiria buru na gûtî we waatigara.
Nyumeene Joshua na antû baawe nî beetîre barataa ntûûra ya Hazori, na barooraga mûnene waayo na rûchiû. Ntûûra ya Hazori nîyo yatwîre îrî na inya nkûrûki ya moonene jau jangî jonthe ja gûntû kûu.
Antû ba Israeli nî baataîre into bionthe bia ntûûra îîu amwe na nyomoo cia ndîîthia. Îndî Aisraeli barooraga antû ba ntûûra iu bonthe na rûchiû barabathiria buru batîtigie noo ûmwe arî mwoyo.
Nthîgûrû iji nîcio Joshua aataîre: gûntû kûrîa kûrî irîma, na nthîgûrû îrîa îrî bwa ûmotho bwa Juda yonthe, na nthîgûrû yonthe ya Gosheni, na mûgwanthî, na kîguuru kîa rûûjî rwa Jorodani, na nthîgûrû îrîa îrî irîma ya Israeli, amwe na igwanthî biaayo;
Nî MWATHANI Mweneinya waatûmîte nkoro cia antû bau ciûma nîkenda barwaa na Israeli nabo bathirua buru batîkwigîrîîrua kîaao o ta ûrîa MWATHANI eerîte Musa.
O îgiiteene rîu, Joshua nî eetîre arooraga imuntû birîa bietagwa Anakimu kuuma irîmeene, na Heburoni, na Debiri, na Anabu, na îrîmeene bia Juda na Israeli bionthe, arabathiria buru amwe na ntûûra ciaao.