Chu ko laitorinikab emonoto, che kibar lagokab Israel, ak konam emenywa kobunji eng’ Jordan bitonin, ole tokyingei ole chorune asista, koboch atebwetab Arnon kot koit tulwetab Hermon, ak Araba tugul ne tokyingei kong’asis:
Sihon laitoriatab Amorik, ne kimenyei Hesbon, ne kibou koboch Aroer, ne mi tabandab atebwetab Arnon, ak koboch kwenutab atebwet, ak kebebertab Gilead, kot koit ainetab Jabok, kiwotetab lagokab Amon;
ak Araba agoi nyanjetab Kinerot, ne tokyingei kong’asis, kot koit nyanjetab Araba, ne noto Araraita ne bo Munyuk, ne tokyingei kong’asis, oret ne wendi Bet-jesimot; ak eng’ murot ne bo tai, eng’ chepkeigeusiekab Pisga kel:
ak kibounisiei eng’ tulwetab Hermon, ak Saleka, ak Basan komugul, kot koit kiwotetab Gesurik, ak Maakatik, ak kebeberta ne bo Gilead, kiwotetab Sihon laitoriatab Hesbon.
Kibar Musa, otwogindetab Jehovah koboto lagokab Israel ichek: ak kogochi Musa otwogindetab Jehovah emonoto bikab Reuben ak che bo Gad ak kebebertab bororietab Manase, kobunji.
Chuto laitorinikab emonoto che kibar Josua ak lagokab Israel eng’ Jordan bitonin ole tokyingei cherongo, koboch Baal-gad eng’ atebwetab Lebanon kot koit tulwetab Halak, ne togostoi agoi Seir; ak kiigochi Josua emonoto bororiosiekab Israel kobunji ko u pcheutikwak;
eng’ emetab tulonok, ak eng’ warenget, ak eng’ Araba, ak eng’ chepkeigeusiek, ak eng’ ong’atet, ak eng’ Murot ne bo Tai; Hitik, ak Amorik, ak Kananik, ak Perisik, ak Hibik, ak Jebusik: