Ad Amoritsa dĩm a Siyõ; a da kẽeda Esbõ, a na-tẽngẽ. A ra soo Aroɛr sẽn be Arno noore, n paas Galaad bogre, n ta Yabok kʋɩl-bɛɛga sẽn ya toaag ne Amonitsã.
A ra soo Zʋrdẽ bãooga bogr ning sẽn tees yaanga, n paas Zenezarɛt Mogrã, nug goabg sẽnẽ, n ta Yamsem Mogre, Bɛt-Yesimot yegende la Pisga tãng weoogo, nug rɩtg sẽnẽ.
Yẽ me ra soo Ermo tãnga ne Salka la Bazã tẽn-peelma zãng n ta Gesuritsa la Maakatitsa toaaga, n paas Galaad bogra sẽn kelle, n tekd Esbõ dĩm a Siyõ toaagẽ.
Ad tẽns niyns a Zozuwe ne Israyɛl kamba sẽn pãb n deeg Zʋrdẽ rʋʋnde, nin-taoore, Baal-Gad sẽn be Libã bãg-faagẽ n ta Alak Tãng sẽn lug Seyir sẽnẽ. A Zozuwe pʋɩ-la b tẽnsã n kõ a Israyɛl buud fãa a rẽnna.
Tẽn-bãmb ra luga ne tãmse bɩ n yɛdg bãado. Le yaa Zʋrdẽ bãg-faaga, ne kunkubã, we-raoogã sẽn kõsd nug rɩtgã. Ra yaa Ititse, Amoritse, Kanaã rãmba, Perizitse, Ivitse la Zebuzits tẽnse.