Echi nachio chingongo Abaisraeli baatananeretwe ase ense ya Kanani, chibe emiando yabo. Eleazari, omokuani, amo na Yoshua, mosinto o Nuni, na abateneneri be chiamate chi’ebisaku bi’Abaisraeli bakabaatananera ense ase ogoaka obomera.
Naki Musa konya oeire ebisaku binde bibere na ekeng’ese ense ere ng’umbu, moocha ya Yorodan, ebe omwando obo, korende Abalawi barabwo tibaetwe ense ase egati yabo, ebe omwando obo.
Bono rora, emiaka emerongo ene, na etano, yaetire korwa rituko riria Omonene atebetie Musa amang’ana ayio, ase engaki eria Abaisraeli baetete ase erooro, na Omonene ondendire ngendererete koba moyo. Na bono, rora, nabeire nemiaka emerongo etano na etato, na etano,
na inche nigo inde ne chinguru ching’ana buna chiria nabwate rituko riria Musa antomete. Nonya ndero nabo inde ne chinguru chi’okogenda korwana esegi na echi’okoirana.