Koko rero indi miryango ibiri na kimwe cya kabiri cy’undi muryango, Musa yari yarabahaye umunani wabo hakurya ya Yorudani. Abalevi, bo, nta munani bahawe mu bandi.
Bene Yozefu bari bagabanijwemo imiryango ibiri, uwa Manase n’uwa Efurayimu; naho Abalevi nta wundi mugabane bahawe mu gihugu, uretse imigi yo kubamo n’imirima rusange yayo, kubera amatungo n’ibintu byabo.
Bene Yuda baza kwa Yozuwe i Giligali, maze Kalebu mwene Yefune w’Umukenizi aramubwira ati «Uzi neza ibinyerekeyeho Uhoraho yabwiriye Musa, umuntu w’Imana, i Kadeshi‐Barineya.
Ubwo Musa, umugaragu w’Imana, ari i Kadeshi‐Barineya, yanyohereje gutata iki gihugu, nari mfite imyaka mirongo ine kandi mugezaho ibyo yari yantumye nta buryarya.
Ingufu nsigaranye, ni nk’izo nari mfite ubwo Musa anyohereje mu butumwa; imbaraga mfite ubu zirangana n’izo nari mfite icyo gihe, haba mu kurwana, haba no mu gukora.