A Zozɛf buuda ra yaa rot a yiibu: a Manase roog la a Efrayim roogo. La Levitsa ka paam soolem sã n ka tẽns kẽer bala b sẽn na n kẽedẽ, bãmb ne b rũmsi n paas pʋt la rũmsa wãbneg zĩisi.
A Zɩɩda neb n waa n yãend a Zozuwe Gilgal. Kenitg a Yefune biig a Kalɛb, yeel-a lame: «Fo mii Soaala sẽn wilg a Moyiiz, Soaala-Wẽnd tʋʋm-tʋmda, mam poorẽ la fo me poorẽ, Kadɛs-Barnea.
M da tara yʋʋm pis-naase, Soaala-Wẽnd sõgna, a Moyiiz, sẽn waa n tʋm-m Kadɛs-Barnea tɩ m wa bãng tẽnga nenga. M lebgre m pelga m pʋg n togs m sẽn yãende.
Yaa baraar la a Moyiiz wẽen woto: ‹Tẽng ning f sẽn tabg ne f naoorã na n yɩɩ foo ne f kamba soolem, yʋʋm sẽn ka be sɛɛbo, tɩ fo tũu Wẽnnaam, f Soaala zãnga.›
Dẽ tɛka Soaala-Wẽnd wogla m yõore wala b sẽn kãabe. Yaa yʋʋm pis-naas la a nu rõanna la Soaala pʋlem-m dẽ, dẽ t'a Israyɛl nan keta we-raoogẽ, la m yʋʋm yaa pis-nii la a nu marsã.
Kõ-m tãms tẽns niyns Soaala-Wẽnd sẽn kãab-m, baraare, tɩ b na n kõ-m lame wã, tɩ baraare f wʋmame tɩ Anakits n da kẽed be la b tẽnsa da yaa tẽn-bɛd n tar pãnga. Daare Naaba-Wẽnd na zĩnd ne ma la m na reeg-b n sooge tɩ Soaala-Wẽnd n pʋlme.»