Šedi tše Baisiraele ba di abetšwego nageng ya Kanana, tše ba di aroletšwego ke Eleasara le Joshua morwa wa Nuni le bagolo ba dilete tša meloko ya Baisiraele.
Ka gobane meloko e mebedi le seripa sa leloko la Manase o be a šetše a e abetše naga mošola wa Jorodane, mme Balefi bona ga ba ka ba abelwa naga bjaloka meloko e mengwe.
Ga e le bana ba Josefa, bona ba tšwele meloko e mebedi, e lego la Manase le la Efuraimi. Balefi bona, ka go se newe naga, ba newa metse gore ba dule go yona, le mafulo a dikgomo tša bona le a diruiwa tša bona.
Bajuda mola ba sa le kua Giligala, ba ile ba tla go Joshua; mme Kalebe morwa wa Jefune Mokenisi a mo rera a re: Lentšu lela le Morena a le laetšego Moshe monna wa Modimo ka baka la ka le ka baka la gago, o a le tseba.
Ke be ke na le nywaga e masome a mane mola re le Kadese-Baranea mme Moshe mohlanka wa Morena a nthoma ka hlola naga ye; ka boa ka mo anegela ditaba tša mo pelong ya ka.
Mohla woo Moshe e ena a re: Ka kgonthe naga yeo e gatilwego ke maoto a gago, e tlo newa wena le bana ba gago, ya ba magae a neng le neng; ka gobane o latetše Morena ka botlalo.
Bjalo ke nna e; Morena o mphedišitše bjalo ka ge a boletše. Lehono ke nywaga e masome a mane le metšo e fetšago seatla go tloga mola a botša Moshe lentšu leo. Nywaga ye ya fela Isiraele a sepela lešokeng. Bjalo šedi, lehono ke na le nywaga e masome a seswai le metšo e fetšago seatla.
Bjale a ko mphe ditaba tše, ka mo Morena a boletšego mohla wola. Ka gobane wena o di kwele mohla wola, gore gona mo go na le Baenaki, le metse e megolo ya dibo. Mohlomong Morena o tlo ema le nna ka ba raka ka mo Morena a boletšego.
Ka mokgwa wo motse wa Heburone ya ba wa Kalebe morwa wa Jefune Mokenisi, ya ba legae la gabo go fihla lehono, ka gobane a latetše Morena Modimo wa Isiraele ka botlalo.