×

現代台語譯本羅馬字版

約書亞記 16

1
Iok-sek ê hō͘-tāi thiu-chhiam só͘ tit--tio̍h ê tōe, sī tùi óa-kūn Iâ-lī-ko ê Iok-tàn-hô khí, ēng Iâ-lī-ko tang-pêng ê hô-chúi chòe pian-kài, ǹg pak keng-kè khòng-iá, ti̍t-kàu Pek-te̍k-lī ê soaⁿ-khu;
2
koh tùi Pek-te̍k-lī kàu Lō͘-su, keng-kè A-ki -lâng ê kéng-kài, kàu A-tha-lio̍k;
3
koh ǹg sai lo̍h-khì kàu Ap-lī-thê -lâng ê kéng-kài, keng-kè Ē Pek Hô-lûn ê kéng-kài, kàu Ki-sek, thàng kàu Tōe-tiong-hái ûi-chí.
4
Chiah-ê chiū-sī Iok-sek ê hō͘-tāi Má-ná-se kap Í-hoat-liân só͘ tit--tio̍h ê ke-gia̍p.
5
Ē-bīn sī Í-hoat-liân ê hō͘-tāi chiàu in ê chong-cho̍k só͘ tit--tio̍h thó͘-tōe ê pian-kài: Tang-pêng tùi A-tha-lio̍k A-ta̍t-ní kàu Téng Pek Hô-lûn;
6
chit-ê pian-kài ǹg sai thàng kàu Tōe-tiong-hái. Pak-pêng tùi Bi̍t-bí-tha ǹg tang se̍h kàu Tha-la̍p Sī-lô, keng-kè A-ná ê tang-pêng,
7
tùi A-ná ǹg lâm lo̍h-khì kàu A-tha-lio̍k, koh kàu Ná-la, thàng kàu Iâ-lī-ko, ti̍t-kàu Iok-tàn-hô ûi-chí.
8
Chit-ê pian-kài tùi Tha-phó͘-a ǹg sai, sūn Ka-ná-khoe, thàng kàu Tōe-tiong-hái ûi-chí. Che chiū-sī Í-hoat-liân chi-cho̍k, chiàu in ê chong-cho̍k tit--tio̍h ê ke-gia̍p.
9
Lēng-gōa tī Má-ná-se -lâng ê kéng-lāi, chiong kúi ê siâⁿ kap hù-kūn ê chng-siā pun hō͘ Í-hoat-liân -lâng.
10
Í-hoat-liân -lâng bô hoat-tō͘ chiong tòa tī Ki-sek ê Ka-lâm -lâng kóaⁿ--chhut-khì; Ka-lâm -lâng tòa tī Í-hoat-liân -lâng ê tiong-kan chòe khó͘-kang ho̍k-sāi in, ti̍t-kàu kin-á-ji̍t.
Chinese TTVR
The Bible Society in Taiwan
:
保存笔记