|
| 1 |
|
| Maa^natv^se se Yosepv nyei dorn-hlo. Maaki se Maa^natv^se nyei dorn-hlo yaac zoux Gi^le^aatc nyei die. Naaiv se paaiv bun Maa^natv^se Mienh nyei ndau. Maaki duqv Jor^ndaen Ndaaih dong bung maengx nyei Gi^le^aatc caux Mbaasaan Deic benx ninh nyei buonc weic zuqc ninh zoux mborqv jaax henv nyei baeng. |
|
| 2 |
|
| Naaiv se paaiv bun zengc njiec nyei Maa^natv^se Mienh nyei ndau, ziux ninh mbuo nyei bungh buonc, se maaih Aa^mbi^ye^se, Helekv, Atc^li^en, Sekem, Hefe caux Se^mi^ndaa. Naaiv deix m'jangc dorn benx Yosepv nyei dorn, Maa^natv^se, nyei zeiv-fun ziux ninh mbuo nyei bungh buonc. |
|
| 3 |
|
| Se^lo^fe^hatc zoux Hefe nyei dorn, Hefe zoux Gi^le^aatc nyei dorn, Gi^le^aatc zoux Maa^ki^le nyei dorn, Maa^ki^le zoux Maa^natv^se nyei dorn. Se^lo^fe^hatc maiv maaih dorn, kungx maaih sieqv hnangv. Sieqv nyei mbuox heuc Maa^haa^laa, Noyaa, Hokv^laa, Minkaa, Ti^laa^saa. |
|
| 4 |
|
| Ninh mbuo mingh lorz E^le^aa^saa sai mienh caux Nun nyei dorn, Yo^su^waa, caux zoux bieiv zeiv nyei mienh gorngv, “ Ziouv paaiv ziangx Mose bun yie mbuo yiem yie mbuo nyei cien-ceqv mbu'ndongx maaih yie mbuo nyei buonc nzipc.” Yo^su^waa ziouc bun ninh mbuo yiem ninh mbuo nyei die nyei gorx-youz mbu'ndongx duqv ninh mbuo nzipc nyei buonc ziux Ziouv paaiv ziangx nyei waac. |
|
| 5 |
|
| Hnangv naaic Maa^natv^se Mienh duqv ziepc gouv ndau, maiv funx yiem Jor^ndaen Ndaaih dong bung maengx, Gi^le^aatc Deic caux Mbaasaan Deic, |
|
| 6 |
|
| weic zuqc Maa^natv^se Fingx nyei sieqv duqv caux jienv Maa^natv^se Fingx nyei dorn maaih buonc nzipc. Maa^natv^se zengc njiec nyei zeiv-fun duqv Gi^le^aatc Deic benx ninh mbuo nyei buonc. |
|
| 7 |
|
| Maa^natv^se nyei gapv-jaaix yiem Aa^se nyei gapv-jaaix mingh taux Sekem Zingh dong bung maengx, Mikv^me^tatv Mungv. Gapv-jaaix aengx njiec naamh bung maengx taux En Tapv^bu^waa Mienh nyei dorngx. |
|
| 8 |
|
| Weih gormx Tapv^bu^waa Mungv nyei ndau benx Maa^natv^se Mienh nyei buonc, mv baac Tapv^bu^waa Mungv ganh yiem Maa^natv^se nyei gapv-jaaix, yaac benx E^faa^im nyei zeiv-fun nyei ndau. |
|
| 9 |
|
| Gapv-jaaix aengx njiec taux Kaanaa Ndoqv. Yiem ndoqv nyei naamh bung maaih deix E^faa^im Mienh nyei zingh zorpc jienv Maa^natv^se Mienh nyei zingh. Maa^natv^se nyei gapv-jaaix aengx gan ndoqv nyei baqv bung maengx jiex mingh donx jienv koiv. |
|
| 10 |
|
| Naamh bung maengx benx E^faa^im Mienh nyei deic-bung. Baqv bung maengx benx Maa^natv^se nyei. Yaac maaih koiv zoux ninh mbuo nyei gapv-jaaix. Baqv bung maengx daaux jienv Aa^se Deic. Dong bung maengx daaux Itc^saax^kaa Deic. |
|
| 11 |
|
| Yiem Itc^saax^kaa caux Aa^se nyei deic gu'nyuoz Maa^natv^se aengx maaih Mbetc Saan Zingh, Ipc^le^am Zingh, Ndo^aa Zingh, En^ndo Zingh, Taa^aa^naakv Zingh, Me^gitc^ndo Zingh, caux weih gormx naaiv deix zingh nyei fiuv-laangz. (Da'faam wuov norm zingh se Naafotv.) |
|
| 12 |
|
| Mv baac Maa^natv^se Mienh zunc wuov deix zingh nyei mienh maiv cuotv weic zuqc Kaa^naa^an Mienh corc ngaengc jienv yiem wuov norm deic-bung. |
|
| 13 |
|
| Nqa'haav I^saa^laa^en Mienh henv daaih ziouc aapv Kaa^naa^an Mienh zuqc zoux gong kouv, mv baac maiv zunc ninh mbuo cuotv nzengc. |
|
| 14 |
|
| Yosepv nyei zeiv-fun gorngv mbuox Yo^su^waa, “Meih weic haaix diuc paaiv nduqc gouv ndau bun yie mbuo nzipc hnangv? Yie mbuo maaih mienh camv, weic zuqc Ziouv ceix fuqv bun yie mbuo taux ih zanc.” |
|
| 15 |
|
| Yo^su^waa dau ninh mbuo, “Se gorngv meih mbuo maaih mienh camv haic, E^faa^im Mienh nyei mbong-aiv dorngx yaac weic meih mbuo hepc haic nor, gunv faaux Be^litv^si Mienh caux Le^faa^im Mienh nyei gemh zaqv daaih weic meih mbuo ganh maah!” |
|
| 16 |
|
| Yosepv nyei zeiv-fun gorngv, “Naaiv deix mbong-aiv dorngx corc maiv gaux yie mbuo yiem. Da'faanh yiem wuov ndau-baengh nyei Kaa^naa^an Mienh yaac maaih mborqv jaax nyei hlieqv-cie, liemh yiem Mbetc Saan Mungv caux wuov norm mungv nyei fiuv-laangz caux yiem Yitv^le^en Horngz nyei mienh.” |
|
| 17 |
|
| Yo^su^waa gorngv mbuox Yosepv nyei zeiv-fun, E^faa^im caux Maa^natv^se Mienh, “Meih mbuo maaih mienh camv yaac za'gengh henv haic. Meih mbuo maiv daan oix duqv nduqc gouv ndau hnangv. |
|
| 18 |
|
| Liemh naaiv deix mbong-aiv dorngx oix benx meih mbuo nyei. Maiv gunv benx gemh lomc, meih mbuo oix zuqc yiem naaiv bung zaqv tong taux wuov bung gapv-jaaix jomc. Yietc zungv ziouc benx meih mbuo nyei nzengc. Maiv gunv Kaa^naa^an Mienh maaih mborqv jaax nyei hlieqv-cie yaac maaih qaqv henv haic, meih mbuo zungv haih zunc ninh mbuo cuotv mingh.” |
|
|
|
|