Nɛmɛ ɛ jɛn pëk ëë yiɛɛth rɔ kɛ do̱r Ma-na-thɛ in la kɛ̈ɛ̈ Jo-thɛp. Täämɛ cu Gil-yad kɛnɛ Ba-can wä kä ma-kir in la kɛ̈ɛ̈ Ma-na-thɛ kä gua̱n Gil-yad kɛ ɣöö ɛ wääth mi lia̱a̱.
Kä duɔth gan Ma-na-thɛ tin kɔ̱ŋ tëë ca tëm gua̱a̱th kɛ kui̱ thukni duëlikiɛn kɛn tin, gaat Ä-bi-ɛ-dhɛr, kɛnɛ gaat Ɣe-lɛk, kɛ gaat A-thi-rel, kɛ gaat Cɛ-kɛm, kɛnɛ gaat Ɣe-pɛr, kɛ gaat Cɛ-mi-dhä. Tɔ̱tɔ̱ kɛ kɛn kuay gan gatdä Jo-thɛp ni Ma-na-thɛ tin la tut gɔalikiɛn.
Kä Dhɛ-lɔ-pɛ-ɣadh in la gat Ɣe-pɛr in la gat Gil-yad in la gat Ma-kir in la gat Ma-na-thɛ, thilɛ dhɔɔl ti cɛ di̱eth ɛ ni nyi̱er kärɔ̱, kä nyieekɛ ciöötkiɛn tin, Maɣ-la kɛnɛ Nowa, kɛ Ɔg-la kɛnɛ Mil-ka kɛ Ti̱r-dha.
Kä key rööl Ma-na-thɛ cuɛ jɛ ka̱n ni kä A-cɛr wëë yɔ̱a̱t ni Mik-mɛ-thath in lot ni käny cäŋ Cɛ-kɛm, kä cuɛ jɛ nyɔk kɛ ri̱t cueec amäni rɛy ciëëŋni Een-ta-pu-a.
Ɛ jɛn, cu key rɔ wä pi̱em ni waaŋ Kana peek in lot ni kui̱c targɛ̈w waŋ ɛmɛ, rɛ̈kɛ diaal tekɛ rɛy rɛ̈kni Ma-na-thɛ, kä kɛ nyin Ɛ-pa-rim. Kä key Ma-na-thɛ in lot ni kui̱c kayŋua̱a̱k waŋ ɛmɛ te ke̱k këthdɛ ni Bar in Bo̱r in te kam wi̱i̱ni.
Kä cuecdɛ rööl ɛ duŋ Ɛ-pa-rim, kä cu camdɛ a duŋ Ma-na-thɛ kä pëkdɛ ɛ Bar in Bo̱r in te kam wi̱i̱ni. Kä kui̱c kayŋua̱a̱k ro̱mkɛ kä A-cɛr, kä römdiɛn kä käny cäŋ ɛ Yi-tha-kar.
Täämɛ cu do̱r kuayni Jo-thɛp Jɔ-cua jiök i̱, “Ɛ luɔt ŋukä min jak ji̱ kä bi ɣä ka̱m ni guɔk kɛl kä ci ɣä ŋuɔ̱k ni jɔw muɔ̱ɔ̱n kɛl, kä nɛɛni jɛ ɛn ɣöö ci Kuoth Nhial kɔ puɔ̱ŋ ɛlɔ̱ŋ.”
Cukɛ jɛ loc i̱, “Ɛn päm kuiyɛ ɛlɔ̱ŋ kɛ kɔ, kä kɛn ji̱ Kɛ-naan diaal tin ciaŋkɛ ni rɛy paan täpä tekɛ kɛ thurbiɛɛli yie̱e̱thä, matdiɛn kɛɛl amäni nɛy tin cieŋ kä Beth-can kɛnɛ dho̱rkɛ, kɛ tin te paan Täpä kä Yidh-rɛɛl.”