ऍह बरे इस्राएल क दुइ ठु मनइयन क खोज मँ राजा क मनई चला गएन। राजा क मनइयन क जरिये सहर छोड़ देइ क तुरन्त पाछे सहर क दुआर बन्द कइ दीन्ह गएन। उ पचे ओन ठउरन पइ गएन जहाँ स लोग यरदन नदी क पार करत रहेन।
हम पचे डेरान अही काहेकि हम पचे सुनि चुका अही कि यहोवा तू लोगन क मदद कइसे किहस ह। हम सुने अही कि तू पचे मिस्र स बाहेर आवा अहा तउ यहोवा लाल सागर क पानी क सोखाइ दिहस। हम पचे इ भी सुने अही कि तू लोग दुइ ठु एमोरी राजा लोग, सीहोन अउ ओग क संग का किह्या। हम पचे सुने अही कि तू लोग यरदन नदी क पूरब मँ रहइवाले ओन दुइ राजा लोगन क कइसे पूरी तरह स हरा दिहेस।
हम पचे ओन सबइ घटना क सुने अही अउर बहोत जियादा डेराइ ग अही अउर अब हम मँ स कउनो मनई ऍतना हिम्मती नाहीं कि तू लोगन स लड़ि सकइ। काहेकि तोहार परमेस्सर यहोवा ऊपर सरग अउ तरखाले भुइँया पइ हुवूमत करत ह।
मोसे तू पचे इ कहा कि तू पचे मोरे परिवार क जिअत रहइ देब्या जेहमाँ मोरे पिता, भाई, बहिनियन अउर ओनके परिवार होइहीं। तू पचे प्रण करा कि तू पचे हमका मउत स बचउब्या।”
ओ मनइयन ओका मान लिहन। उ पचे कहेन, “हम तोहरी जिन्नगी बरे अपनी जिन्नगी क बाजी लगाइ देब। कउनो मनई स न बतावा कि हम पचे का करत अही। तब जब यहोवा हम लोगन क हमार देस देइ, तब हम पचे तोहे पइ दाया करब। तू हम पचन्पइ बिस्सास कइ सकत ह।”
तब उ मेहरारु ओनसे कहेस, “पच्छिम क पहाड़ियन मँ जा, जेहसे राजा क सिपाही तू पचन्क एकाएक न घर पकड़इँ। हुआँ तीन दिन छुपा रहा। राजा क मनई जब लउटि आवइँ तब तू पचे आपन राहे पइ जाइ सकत ह।”
तू इ लाल लसुरी क उपयोग हम पचन्क बचिके पराइ जाइ बरे करति अहा। हम पचे इहइ ठउर मँ लउटब। उ समइ तोहका इ लाल लसुरी क आपन खिड़की स जरुर बाँधइ क होइ। तोहका आपन पिता, आपन महतारी, आपन भाई अउर आपन पूरा परिवार क आपन संग इ घरे मँ रखइ क होइ।
उ पचे ओकरे घरे क तजिके पहाड़ियन मँ चला गएन जहाँ उ पचे तीन दिन रुकेन। राजा क मनइयन पूरी सड़किया पइ ओनकर खोजबीन किहस। तीन दिन पाछे राजा क मनइयन खोज बन्द कइ दिहन। उ पचे ओनका नाहीं हेर पाएन, सो उ पचे सहर मँ लउटि आएन।