O ni tooi zo n-kuli tinsi maa zaɣ’ yin’ ni chaŋ ti zani tiŋ’ maa dunɔdali gbini n-kahig’ o yɛla ni nyɛ shɛm zaa yɛli tiŋ’ maa kpamba; ka bɛ zaŋ o kpe tiŋ’ maa ni ti ti o biɛhigu shee, ka o kpalim be bɛ sani.
Ka o ni tooi be tiŋ’ maa ni hal ka bɛ ti kar’ o saria palɔni, ka o na kul ni be nimaani hal ni maligumaaniba zuɣulaan so ŋun beni ka o tum tuuni maa kum nyaaŋa, di saha ka o naanyi tooi lab’ o ya din nyɛ o ni daa zo luɣ’ shɛli maa ti beni.”
Dinzuɣu ka bɛ daa pii Kɛdɛshi din be Galili Naftali zuliya niriba tiŋgban’ ni zoli zuɣu la mini Shɛkɛm din daa be Ifriim zuliya niriba tiŋgban’ ni zoli zuɣu la ni Kiriatariba (bɛ ni lan booni shɛli Hiburɔn) din be Juda zuliya niriba tiŋgban’ ni zoli zuɣu la.
Jɔɔdɛn Mɔɣili duli zaŋ lab’ Jɛriko wulimpuhili polo, bɛ daa piila Bɛza din be Rubin zuliya niriba tiŋgban’ ni la mini Ramɔt din be Giliad Gaad zuliya niriba tiŋgban’ ni la ni Golan din be Bashan Manaasa zuliya niriba tiŋgban’ ni la.
Tinsi ŋɔ ka bɛ daa pii ti Izraɛlnim’ zaa zaŋ tabili tinzunnim’ bɛn daa be bɛ ni. Bɛ daa niŋla lala ni di yi ti niŋ daliri ka so ku o kpee sarati kubu, ŋun’ zom’ kuli di ni tiligi ninvuɣ’ so ŋun dol’ o ni o ku o yo samli nuu ni hal ti paai saha shɛli bɛ ni yɛn kar’ o saria.